जळगाव-लाईव्ह ट्रेंडस न्यूज प्रतिनिधी । उन्हाळ्याची चाहूल लागताच जळगावचा पारा चाळीशी ओलांडू लागला आहे. या रणरणत्या उन्हात केवळ माणसांनाच नव्हे, तर पशू-पक्ष्यांनाही पाण्यासाठी दाहीदिशा भटकंती करावी लागते. हेच ओळखून, ‘राष्ट्रीय चिमणी दिना’चे औचित्य साधत ‘रुक्मिणी फाउंडेशन’ या सेवाभावी संस्थेने गेल्या २० वर्षांची आपली परंपरा यंदाही कायम ठेवली आहे. नवीन बस स्थानक परिसरात प्रवाशांना आणि नागरिकांना पक्ष्यांसाठी मातीचे परळ (पाण्याचे पात्र) आणि धान्य पुड्यांचे मोफत वाटप करण्यात आले.
मान्यवरांची उपस्थिती आणि कौतुक :
या सामाजिक उपक्रमाचे उद्घाटन जळगाव विभाग नियंत्रक दिलीप बंजारा, इंटक संघटनेचे नरेंद्र सिंह राजपूत, भाजप महानगर जिल्हाध्यक्ष दीपक सूर्यवंशी, नशिराबाद नगरपरिषदेचे सभापती कीर्तीकांत चौबे आणि डॉ. अमित वर्मा यांच्या प्रमुख उपस्थितीत झाले. मान्यवरांनी फाउंडेशनच्या कार्याचा गौरव करत, निसर्गाचा समतोल राखण्यासाठी प्रत्येकाने आपल्या घराच्या गॅलरीत किंवा छतावर पक्ष्यांसाठी पाण्याची सोय करावी, असे आवाहन केले.
२० वर्षांचा अविरत सेवायज्ञ :
रुक्मिणी फाउंडेशनचे संस्थापक पंकज जैन आणि अध्यक्ष रवींद्रसिंह राजपूत यांच्या मार्गदर्शनाखाली हा उपक्रम गेल्या दोन दशकांपासून अविरत सुरू आहे. केवळ एक दिवसाचा कार्यक्रम न ठेवता, संपूर्ण उन्हाळाभर पक्ष्यांची काळजी घेण्याचा संदेश यावेळी देण्यात आला. बस स्थानकावरील शेकडो प्रवाशांनी या उपक्रमाला उत्स्फूर्त प्रतिसाद देत स्वतःच्या घरी पक्ष्यांसाठी पात्रांची व्यवस्था करण्याचा संकल्प केला.
पर्यावरण रक्षणाचा संदेश :
कार्यक्रमाचे सूत्रसंचालन वासंती चौधरी यांनी केले, तर आभार रवींद्रसिंह राजपूत यांनी मानले. हा कार्यक्रम यशस्वी करण्यासाठी डॉ. विजय साखला, निलेश नागला, मनीष वाणी, महाश्वेता माथुरवैश्य आणि ज्योती श्रीवास्तव यांच्यासह फाउंडेशनच्या सदस्यांनी मोलाचे परिश्रम घेतले. वाढते प्रदूषण आणि सिमेंटच्या जंगलात चिमण्यांची संख्या घटत चालली आहे. अशा वेळी रुक्मिणी फाउंडेशनने घेतलेला हा पुढाकार जळगाव शहरात चर्चेचा आणि कौतुकाचा विषय ठरला आहे.
