अमरावती-वृत्तसेवा | देशातील राजकीय वातावरण आधीच तापलेले असताना भाजप नेत्या नवनीत राणा आणि एमआयएमचे अध्यक्ष खासदार असदुद्दीन ओवेसी यांच्यातील शाब्दिक युद्ध अधिक तीव्र झाले आहे. लोकसंख्येच्या मुद्द्यावरून सुरू झालेला हा वाद आता थेट राष्ट्रनिष्ठा, संविधान आणि कायदेशीर चौकटीपर्यंत पोहोचला आहे.
काही दिवसांपूर्वी नवनीत राणा यांनी एका मौलानाच्या वक्तव्याचा संदर्भ देत हिंदूंना उद्देशून केलेले विधान मोठ्या प्रमाणावर चर्चेत आले. “जर ते १९ मुलं जन्माला घालत असतील, तर आपणही किमान चार मुलं जन्माला घातली पाहिजेत” असे वक्तव्य करताच त्याचा व्हिडिओ सोशल मीडियावर झपाट्याने व्हायरल झाला. या वक्तव्यावरून देशभरात संमिश्र, पण तीव्र प्रतिक्रिया उमटल्या.
या विधानाला प्रत्युत्तर देताना असदुद्दीन ओवेसी यांनी अमरावतीतील जाहीर सभेत उपरोधिक शैलीत नवनीत राणांना डिवचले. “चार नाही, तर आठ मुलं जन्माला घाला, आम्हाला त्याचं काहीही देणंघेणं नाही” असे म्हणत त्यांनी हा मुद्दा वैयक्तिक नसून राजकीय हेतूने उभा केला जात असल्याचा आरोप केला. अशा वक्तव्यांमुळे महागाई, बेरोजगारी, शिक्षण आणि आरोग्य यांसारख्या मूलभूत प्रश्नांवरून जनतेचे लक्ष हटवले जात असल्याचेही ओवेसी म्हणाले.
ओवेसींच्या टीकेनंतर नवनीत राणा यांनी अधिक आक्रमक भूमिका घेत थेट त्यांच्या राष्ट्रनिष्ठेवर आणि घटनात्मक भूमिकेवर प्रश्नचिन्ह उपस्थित केले. “या देशात राहायचे असेल, तर संविधान मानावे लागते” असे म्हणत त्यांनी ओवेसींवर गंभीर आरोप केले. इतकेच नव्हे, तर ओवेसींचे नागरिकत्व रद्द करून त्यांना पाकिस्तानला पाठवावे, अशी थेट मागणी करत त्यांनी वादाला अधिक धार दिली.
नवनीत राणा यांनी पुढे म्हणत, “पाकिस्तानमध्ये जाऊन दहा नाही, तर वीस मुलं जन्माला घाला” असा टोला लगावला. ओवेसी संसद सदस्य असूनही संविधान, लोकशाही आणि देशभक्तीबाबत स्पष्ट भूमिका घेत नाहीत, असा आरोप करत “भारत माता की जय” आणि “वंदे मातरम” न बोलण्यावरूनही त्यांनी सवाल उपस्थित केला.
इतक्यावर न थांबता, नवनीत राणा यांनी निवडणूक यंत्रणेलाही या वादात ओढले. एमआयएम पक्षाची मान्यता रद्द करावी आणि ओवेसींना देशाबाहेर हाकलावे, अशी मागणी त्यांनी निवडणूक निर्णय अधिकाऱ्यांकडे केली. या वक्तव्यामुळे राजकीय वर्तुळात खळबळ उडाली आहे.
दरम्यान, ओवेसी यांनी आपल्या भाषणात संघप्रमुख मोहन भागवत यांच्या लोकसंख्याविषयक वक्तव्याचा उल्लेख करत, “एकीकडे मुलं जन्माला घालण्याचा सल्ला दिला जातो, तर दुसरीकडे चार-आठ मुलांचा मुद्दा उपस्थित केला जातो” असे म्हणत हा विषय राजकीय द्वेषातून पुढे आणला जात असल्याचा आरोप केला.
या आरोप-प्रत्यारोपांमुळे आगामी निवडणुकांच्या पार्श्वभूमीवर राजकीय वातावरण आणखी तापण्याची चिन्हे आहेत. लोकसंख्या, धर्म, राष्ट्रवाद आणि संविधान या मुद्द्यांवरून संघर्ष अधिक धारदार होत असताना, या वादात सामान्य जनतेचे प्रश्न पुन्हा एकदा बाजूला पडणार का, हा प्रश्न राजकीय निरीक्षक उपस्थित करत आहेत.
