बोदवड-लाईव्ह ट्रेंडस न्यूज प्रतिनिधी । आज बोदवड (नाडगाव) रेल्वे स्टेशनवर एक ऐतिहासिक क्षण अनुभवायला मिळाला. अनेक दिवसांपासूनची बोदवड परिसरातील नागरिकांची मागणी पूर्ण झाली असून, सुरत-अमरावती एक्स्प्रेसला या स्टेशनवर अधिकृत थांबा देण्यात आला आहे. यामुळे परिसरातील प्रवाशांना मोठा दिलासा मिळाला आहे.
लोकप्रतिनिधींच्या प्रयत्नांना यश
या मागणीसाठी शिवसेना, भाजप, राष्ट्रवादी महायुतीचे स्थानिक पदाधिकारी, विविध रेल्वे प्रवासी संघटना आणि सर्वसामान्य नागरिकांनी सातत्याने पाठपुरावा केला होता. अखेर या प्रयत्नांना यश आले. आज आमदार चंद्रकांत पाटील यांच्यासह महायुतीचे कार्यकर्ते, प्रवासी आणि विविध संघटनांच्या प्रमुख पदाधिकाऱ्यांच्या उपस्थितीत हिरवा झेंडा दाखवून या सेवेचा शुभारंभ करण्यात आला.
प्रवाशांच्या समस्यांची दखल
यावेळी आमदार चंद्रकांत पाटील यांनी रेल्वे स्टेशनवरील विविध समस्या, गैरसोयी आणि प्रवाशांच्या तक्रारी जाणून घेतल्या. त्यांनी तात्काळ संबंधित अधिकाऱ्यांना आणि रेल्वे प्रशासनाला या समस्या सोडवण्याबाबत सूचना दिल्या. यापुढेही प्रवाशांच्या सोयी-सुविधांमध्ये वाढ करण्यासाठी प्रयत्न केले जातील, असे आश्वासन त्यांनी दिले.
प्रवाशांसाठी मोठा दिलासा
सुरत-अमरावती एक्स्प्रेसला थांबा मिळाल्यामुळे बोदवड आणि आसपासच्या गावातील लोकांना सुरत व अमरावतीकडे थेट प्रवासाची सोय झाली आहे. त्यामुळे त्यांना आता लांबच्या प्रवासासाठी इतर ठिकाणी जावे लागणार नाही. यामुळे प्रवाशांच्या वेळेची आणि पैशांची बचत होणार आहे. हा निर्णय बोदवडच्या विकासासाठी एक महत्त्वाचे पाऊल मानले जात आहे.
