मुक्ताईनगर-लाईव्ह ट्रेंड्स न्यूज प्रतिनिधी । ३० जून रोजी सेवानिवृत्त झालेले प्राथमिक आरोग्य केंद्र, रुईखेडा येथील ज्येष्ठ आरोग्य सेवक श्री. रवींद्र हिरामण कपले यांचा निरोप समारंभ आज कार्यालयीन सहकाऱ्यांच्या साक्षीने रुईखेडा येथे मोठ्या उत्साहात संपन्न झाला. संत मुक्ताई पालखी सोहळ्याच्या सेवेसाठी पंढरपूर येथे गेलेल्या आरोग्य विभागाच्या चमूसह त्यांचा निरोप साजरा करण्यात आला.
श्री. कपले यांनी दीर्घकाळ आरोग्य सेवेत योगदान दिले असून, त्यांच्या सेवानिवृत्तीनंतर सहकाऱ्यांनी त्यांचा गौरव करत त्यांच्या कार्याची आठवण उजाळली. निरोप समारंभाच्या वेळी मुक्ताईनगर तालुक्याचे वैद्यकीय अधिकारी डॉ. अमित गडेकर, डॉ. सुहास सपकाळे, आरोग्य सहाय्यक विजय पाटील, अनंत भोपळे, आरोग्य सहायिका रंजना मेश्राम यांच्यासह सर्व आरोग्य कर्मचारी उपस्थित होते.
समारंभ प्रसंगी उपस्थितांनी आपल्या भावना व्यक्त करत कपले यांच्या सेवाभावी वृत्तीचे कौतुक केले. उपस्थितांचे म्हणणे होते की, कपले यांनी नेहमीच सामाजिक भान ठेवून लोकांची सेवा केली आणि त्यांचा अनुभव हा नवोदित आरोग्य सेवकांसाठी दिशादर्शक राहिला आहे.
कार्यक्रमात उपस्थितांनी श्री. कपले यांना पुढील वाटचालीसाठी शुभेच्छा देत त्यांचं आभार प्रदर्शन केलं. एक साधा आणि विनम्र स्वभाव असलेल्या कपले यांचा निरोप क्षण भावनिक बनला. त्यांच्या सेवानिवृत्तीनंतर त्यांच्या अनुभवाचा लाभ घेण्याची संधी संस्था गमावली असली तरीही, त्यांचे कार्य सदैव प्रेरणादायी राहील, असे सहकाऱ्यांनी नमूद केले.
कार्यक्रमाचा शेवट हार्दिक शुभेच्छा आणि स्मृतिचिन्ह देऊन करण्यात आला. आरोग्य विभागातील सर्व सहकाऱ्यांनी त्यांच्या पुढील जीवनप्रवासासाठी सदिच्छा व्यक्त केल्या.
