रावेर-लाईव्ह ट्रेंडस न्यूज प्रतिनिधी | रावेर पोलिसांनी अवैध वाळू वाहतुकीविरोधात कठोर कारवाई करत पाच वाहने जप्त केली आहेत. या कारवाईमुळे अवैध वाळू वाहतूक करणाऱ्यांमध्ये खळबळ उडाली आहे. पाल व खानापूर मंडळामध्ये ही कारवाई करण्यात आली असून, पोलिस प्रशासनाने याप्रकरणी पुढील तपास सुरू केला आहे.
गेल्या काही दिवसांपासून रावेर तालुक्यात रात्रीच्या वेळी मोठ्या प्रमाणावर अवैध वाळू वाहतूक होत असल्याच्या तक्रारी नागरिकांकडून प्राप्त झाल्या होत्या. या तक्रारींची गंभीर दखल घेत, रावेर पोलिस ठाण्याचे निरीक्षक डॉ. विशाल जयस्वाल यांनी रात्रीच्या वेळी विशेष मोहीम राबवली. या मोहिमेत चार अवैध वाळू वाहतूक करणाऱ्या ट्रॅक्टर-ट्रॉली आणि एक अशोक लेलँड चारचाकी वाहन जप्त करण्यात आले.
पोलिसांच्या या कठोर कारवाईमुळे अवैध वाळू वाहतूक करणाऱ्यांमध्ये भीतीचे वातावरण निर्माण झाले आहे. यापुढेही अशा प्रकारच्या कारवाया सुरूच राहतील, असे पोलिस प्रशासनाने स्पष्ट केले आहे. अवैध वाळू उपशामुळे पर्यावरणाचे मोठे नुकसान होत असल्याने पोलिसांची ही कारवाई नागरिकांमध्ये समाधानाचे वातावरण निर्माण करणारी ठरत आहे. रावेर पोलिसांचे हे पाऊल तालुक्यातील अवैध वाळू वाहतुकीवर आळा घालण्यासाठी प्रभावी ठरणार असल्याची आशा व्यक्त केली जात आहे.
