वरणगाव-लाईव्ह ट्रेंड्स न्यूज प्रतिनिधी । वरणगाव नगर परिषदेच्या निवडणुकीचा आज मतदान प्रक्रियेचा शेवटचा दिवस असून उद्या मतमोजणी पार पडणार आहे. या पार्श्वभूमीवर कायदा व सुव्यवस्था अबाधित राखण्यासाठी प्रशासनाने महत्त्वाचा निर्णय घेतला असून निकाल जाहीर झाल्यानंतर कोणत्याही विजयी उमेदवारास मिरवणूक काढण्याची अथवा वाद्य वाजवण्याची परवानगी दिली जाणार नसल्याची स्पष्ट माहिती उपविभागीय पोलीस अधिकारी (डीवायएसपी) ढवळे यांनी दिली आहे.
वरणगाव नगर परिषदेच्या मतमोजणीदरम्यान तसेच निकालानंतर कोणताही अनुचित प्रकार घडू नये यासाठी पोलीस प्रशासनाने कडक खबरदारी घेतली आहे. उद्या होणाऱ्या मतमोजणीच्या ठिकाणी आणि वरणगाव शहरात दहा अतिरिक्त पोलीस अधिकारी व ४० होमगार्डचा विशेष बंदोबस्त तैनात करण्यात आला आहे. संपूर्ण परिसरावर पोलीसांचे बारकाईने लक्ष राहणार असून कोणत्याही प्रकारची कायदा मोडणारी कृती सहन केली जाणार नाही, असा इशाराही प्रशासनाकडून देण्यात आला आहे.
मतमोजणीनंतर विजयी उमेदवार किंवा त्यांच्या समर्थकांकडून मिरवणूक, फटाके, वाद्य वाजवणे किंवा गर्दी जमवण्यास मनाई करण्यात आली आहे. शांतता आणि सामाजिक सलोखा राखण्यासाठी हा निर्णय घेण्यात आला असून नागरिकांनी आणि राजकीय कार्यकर्त्यांनी प्रशासनाला सहकार्य करावे, असे आवाहन डीवायएसपी ढवळे यांनी केले आहे.
दरम्यान, वरणगाव नगर परिषदेच्या निकालाकडे सर्वांचे लक्ष लागले असून प्रशासनाकडून शांततेत व सुरक्षित वातावरणात मतमोजणी प्रक्रिया पार पाडण्यावर भर दिला जात आहे. कोणत्याही अफवा पसरवू नयेत आणि कायदा हातात घेऊ नये, असेही पोलीस प्रशासनाने स्पष्ट केले आहे.
एकूणच वरणगाव नगर परिषदेच्या मतमोजणीच्या पार्श्वभूमीवर प्रशासन सज्ज असून शांतता राखण्यासाठी कडक उपाययोजना राबवण्यात येत आहेत.
