बोदवड-लाईव्ह ट्रेंड्स न्यूज प्रतिनिधी । “महसूल सप्ताह २०२५” निमित्ताने राज्य शासनाच्या आदेशानुसार दिनांक ०१ ऑगस्ट ते ०७ ऑगस्ट २०२५ दरम्यान संपूर्ण महाराष्ट्रात महसूल विभागामार्फत विविध उपक्रम राबवले जात आहेत. याचाच एक भाग म्हणून दिनांक ०४ ऑगस्ट २०२५ रोजी राज्यभर ‘छत्रपती शिवाजी महाराज स्वराज्य अभियान’ अंतर्गत महा राजस्व अभियानाचे आयोजन करण्यात आले आहे. बोदवड तालुक्यातील नागरिकांसाठी महसूल सेवा आता थेट त्यांच्या गावात पोहोचणार आहेत.
या अभियानाचा उद्देश म्हणजे नागरिकांना महसूल विभागाच्या विविध सेवा एकाच छताखाली उपलब्ध करून देणे, त्यांच्या अडचणी तात्काळ सोडवणे आणि शासनाच्या योजनांची माहिती थेट पोहोचवणे हा आहे. या पार्श्वभूमीवर बोदवड तालुक्यातील चार महसूल मंडळांमध्ये भव्य शिबिरांचे आयोजन करण्यात आले असून, त्यांचे वेळापत्रक जाहीर करण्यात आले आहे. शेलवड मंडळातील शिबिर गायत्री मंदिर हॉल, जामठी येथे सकाळी १० वाजता, बोदवड मंडळातील शिबिर हनुमान मंदिर, चिखली बुद्रुक येथे दुपारी १२ वाजता, नाडगाव मंडळातील शिबिर जिल्हा परिषद शाळा, नाडगाव येथे दुपारी २ वाजता आणि साळशिंगी मंडळातील शिबिर विठ्ठल मंदिर, मुक्तळ येथे दुपारी ३ वाजता होणार आहे.
या शिबिरांमध्ये ७/१२ आणि ८अ उतारे वाटप, उत्पन्न, जात, अधिवास, आर्थिक दुर्बल घटक प्रमाणपत्रांचे वितरण, जमीनसंबंधित तक्रारींचे तात्काळ निराकरण, शासनाच्या विविध कल्याणकारी योजना यांची माहिती, लाभार्थ्यांना थेट लाभ हस्तांतर (DBT) प्रकरणांमध्ये मदत आणि शेतजमिनींची मोजणी व नकाशे उपलब्ध करून देण्यात येणार आहेत. महसूल विभागाच्या या सेवा सहज व सुलभपणे लोकांपर्यंत पोहोचाव्यात या उद्देशाने हा उपक्रम आखण्यात आला आहे.
या महा अभियानाद्वारे महसूल विभाग आणि नागरिक यांच्यातील अंतर कमी करून कार्यक्षमता वाढवण्याचा प्रयत्न केला जात आहे. विशेषतः ग्रामीण भागात राहणाऱ्या लोकांना शासकीय सेवा मिळवण्यासाठी प्रवास करावा लागू नये, म्हणूनच या सेवा गावपातळीवर आणल्या जात आहेत. या शिबिरांमध्ये प्रत्येक मंडळातील अधिकारी व कर्मचारी उपस्थित राहणार असून, नागरिकांच्या अडचणी ऐकून त्वरित कार्यवाही करण्यात येणार आहे.
या उपक्रमास मोठ्या प्रमाणावर प्रतिसाद मिळावा यासाठी प्रशासनाने व्यापक जनजागृती केली असून, तहसीलदार, बोदवड यांच्या वतीने नागरिकांनी या शिबिरांना मोठ्या संख्येने उपस्थित राहून महसूल विभागाच्या सेवा व योजनांचा लाभ घ्यावा, असे आवाहन करण्यात आले आहे.
