जळगाव-लाईव्ह ट्रेंड्स न्यूज प्रतिनिधी । देशातील तरुणांना रोजगार, कौशल्यविकास आणि उद्योगक्षेत्रात नवे संधीवाटप करण्यासाठी केंद्र सरकारने राबविलेल्या *प्रधानमंत्री विकसित भारत रोजगार योजनेबाबत* उद्योगक्षेत्रात मोठी उत्सुकता निर्माण झाली आहे. या पार्श्वभूमीवर कर्मचारी भविष्य निर्वाह निधी संघटना (EPFO) जळगाव आणि गोदावरी इन्स्टिट्यूट ऑफ मॅनेजमेंट रिसर्च यांच्या संयुक्त विद्यमाने आज 5 डिसेंबर रोजी जळगावात अत्यंत महत्त्वपूर्ण सेमिनारचे आयोजन करण्यात आले. प्रमुख वक्ते म्हणून नाशिक क्षेत्राचे रिजनल कमिशनर अनिल कुमार प्रीतम यांनी या योजनेची सविस्तर माहिती देत तिचे व्यापक लाभ स्पष्ट केले.
कार्यक्रमाच्या व्यासपीठावर जिल्हा भविष्य निर्वाह निधी संघटनेचे असिस्टंट कमिशनर के. के. कुंभार, इन्स्पेक्टर दीपक चौधरी तसेच गोदावरी संस्थेचे संचालक डॉ. प्रशांत वारके हे उपस्थित होते. जिल्ह्यातील सुमारे 120 उद्योजक आणि उद्योग क्षेत्रातील अधिकारी या सेमिनारला उपस्थित राहून योजनांचा प्रत्यक्ष लाभ कसा घेता येईल याची माहिती मिळवली.
योजनेचे महत्त्व सांगताना अनिल कुमार प्रीतम यांनी नमूद केले की, पहिल्यांदाच काम करणाऱ्या कर्मचाऱ्यांना 15 हजार रुपयांपर्यंतचे एक महिन्याचे वेतन सरकारतर्फे उपलब्ध करून देण्यात येणार आहे. हे प्रोत्साहन दोन हप्त्यांमध्ये देण्यात येईल—पहिला हप्ता 6 महिन्यांच्या सेवेनंतर आणि दुसरा 12 महिन्यांच्या सेवेनंतर, तसेच आर्थिक साक्षरता कार्यक्रम पूर्ण केल्यानंतर. बचतीची सवय लागावी यासाठी या प्रोत्साहनातील रक्कम निश्चित कालावधीसाठी ठेव खात्यात जमा केली जाईल.
या योजनेमुळे जवळपास 1.92 कोटी युवक-युवतींना पहिल्यांदा रोजगार संधी मिळणार आहेत. ही योजना 1 ऑगस्ट 2025 ते 31 जुलै 2027 दरम्यान निर्माण झालेल्या सर्व नव्या नोकऱ्यांना लागू असेल. यासाठी केंद्र सरकारने 2 लाख कोटींचा एकत्रित निधी तर खास इएलआय योजनेसाठी 99,446 कोटी रुपयांचा खर्च निश्चित केला आहे. देशात एकूण 3.5 कोटी रोजगारनिर्मितीचे उद्दिष्ट या प्रकल्पातून साधले जाणार आहे.
नियोक्त्यांसाठी असलेल्या भाग ‘ब’ अंतर्गत उत्पादन क्षेत्राला विशेष प्रोत्साहन देण्यात आले आहे. सलग सहा महिने कार्यरत असलेल्या प्रत्येक अतिरिक्त कर्मचाऱ्याबाबत नियोक्त्यांना दोन वर्षांसाठी दरमहा 3000 रुपयांपर्यंत प्रोत्साहन मिळणार असून उत्पादन क्षेत्रातील उद्योगांसाठी हा लाभ चौथ्या वर्षापर्यंत वाढवण्यात आला आहे. 50 पेक्षा कमी कर्मचारी असलेल्या आस्थापनांनी किमान दोन तर मोठ्या आस्थापनांनी पाच अतिरिक्त कर्मचाऱ्यांची भरती केल्यास या लाभांचा लाभ मिळणार असल्याचे प्रीतम यांनी स्पष्ट केले.
या उपक्रमाद्वारे उद्योगक्षेत्रात रोजगारनिर्मितीचा वेग वाढणार असून तरुणांना स्थिर रोजगारासोबत आर्थिक सुरक्षिततेची नवी दिशा मिळणार आहे. कार्यक्रमाचे सूत्रसंचालन कु. भूमिका नाले यांनी केले. कार्यक्रमाविषयी उद्योजकांकडून उत्स्फूर्त प्रतिसाद मिळाला.
शेवटी, या योजनेमुळे युवकांना रोजगार, उद्योजकांना आर्थिक पाठबळ आणि उद्योग क्षेत्राला विकासाचा नवा वेग या तिन्ही पातळ्यांवर मोठा सकारात्मक परिणाम होईल, असा विश्वास व्यक्त करण्यात आला.
