जळगाव-लाईव्ह ट्रेंडस न्यूज प्रतिनिधी । जळगाव महानगरपालिका निवडणुकीचा प्रचार संपल्यानंतर आता संपूर्ण प्रशासन गुरुवारी, १५ जानेवारी रोजी होणाऱ्या मतदानासाठी सज्ज झाले आहे. ही निवडणूक प्रक्रिया अत्यंत शांततेत आणि पारदर्शक वातावरणात पार पडावी, यासाठी जिल्हा पोलीस दलाने सुरक्षेचे चोख आणि सूक्ष्म नियोजन केले आहे. शहरात कायदा व सुव्यवस्थेचा प्रश्न निर्माण होऊ नये म्हणून तगडा फौजफाटा तैनात करण्यात आला आहे.
प्रतिबंधात्मक कारवायांचा धडाका :
निवडणुकीच्या काळात कोणताही अनुचित प्रकार घडू नये, यासाठी पोलिसांनी आधीच ‘ॲक्शन मोड’मध्ये येत ९७ उपद्रवी व्यक्तींवर तडीपारीची कारवाई केली आहे. याशिवाय, ९५ जणांकडून शांततेचा भंग न करण्याबाबत बॉण्ड लिहून घेतले असून, अनेक उमेदवारांना नियमांचे उल्लंघन न करण्याबाबत नोटिसा बजावण्यात आल्या आहेत.
मतदान केंद्रांवर ‘स्पेशल ६१’ पॅटर्न :
शहरातील १९ प्रभागांमधील ७५ जागांसाठी १६९ मतदान केंद्रांवर ५१६ बुथवर मतदान होणार आहे. निवडणूक आयोगाच्या निकषात संवेदनशील केंद्रे नसली, तरी ज्या ६१ केंद्रांवर मोठी गर्दी होण्याची शक्यता आहे, तिथे पोलिसांचा अतिरिक्त बंदोबस्त तैनात करण्यात आला आहे. प्रत्येक मतदान केंद्राच्या १०० मीटर परिसरात कडक निर्बंध असून, मतदारांव्यतिरिक्त कोणालाही प्रवेश दिला जाणार नाही.
असा आहे बंदोबस्ताचा आकडा:
पोलीस उपअधीक्षक: ६, पोलीस अधिकारी: ६०, पोलीस अंमलदार: ११५०, SRPF कंपनी: २ कंपन्या, होमगार्ड: ११४०
मंगळवारी पोलीस कवायत मैदानावर सर्व कर्मचाऱ्यांना बंदोबस्ताचे वाटप करण्यात आले. प्रत्येक मतदान केंद्रावर सीसीटीव्ही कॅमेऱ्यांची करडी नजर राहणार असून, वरिष्ठ पोलीस अधिकारी स्वतः या संपूर्ण प्रक्रियेवर लक्ष ठेवून असणार आहेत. सुरक्षिततेच्या या कडक नियोजनामुळे नागरिक निर्भयपणे आपले मतदान करू शकणार आहेत.
