जळगाव – लाईव्ह ट्रेंड्स न्यूज प्रतिनिधी । गोदावरी फाउंडेशन संचलित डॉ. गुणवंतराव सरोदे आयुर्वेद कॉलेज हॉस्पिटल अँड रिसर्च सेंटर, जळगाव आणि डॉ. उल्हास पाटील कृषी महाविद्यालयात पारंपरिक उत्साहात पोळा सण साजरा करण्यात आला. शेतकऱ्यांचा सखा असलेल्या बैलाच्या पूजनाने सुरु झालेला हा कार्यक्रम संपूर्ण परिसरात आनंदाचे आणि पारंपरिक संस्कृतीने न्हालेलं वातावरण निर्माण करून गेला.
या कार्यक्रमात प्रमुख पाहुणे म्हणून डॉ. उल्हास पाटील, डॉ. सौ. केतकी पाटील, श्री. सुभाष पाटील, डॉ. वैभव पाटील, प्रमोद भिरूड, डॉ. शैलेश तायडे, डॉ. पूनमचंद सपकाळे आणि डॉ. अशोक चौधरी यांची उपस्थिती लाभली होती. शेतकी महाविद्यालय आणि आयुर्वेद कॉलेजचे प्राध्यापक, कर्मचारी आणि विद्यार्थी मोठ्या संख्येने सहभागी झाले होते.
कार्यक्रमाची सुरुवात डॉ. केतकी पाटील यांच्या हस्ते बैलांच्या विधिवत पूजनाने करण्यात आली. पुरणपोळीचा नैवेद्य दाखवून पारंपरिक पद्धतीने बैलांची पूजा करण्यात आली. बैल सजवून आणण्यात आले होते आणि परिसरात पोळ्याच्या सणासारखी पारंपरिक भावना जागृत करण्यात आली.
कार्यक्रमात सहभागी झालेल्या विद्यार्थी व प्राध्यापकांनी ग्रामीण जीवनातील या महत्त्वाच्या सणाचे महत्त्व अधोरेखित करत परंपरेचा गौरव केला. शहरीकरणाच्या वेगात हरवणाऱ्या ग्रामीण सणांना शैक्षणिक संस्थांमध्ये असा मंच मिळणे ही काळाची गरज असल्याचे मत अनेकांनी व्यक्त केले.
या कार्यक्रमाच्या आयोजनातून विद्यार्थ्यांना केवळ शैक्षणिकच नव्हे तर सामाजिक व सांस्कृतिक जाणीवाही बळकट झाली. पारंपरिक सणांचा आधुनिक शिक्षणात समावेश होऊन विद्यार्थ्यांना संस्कृतीशी जोडण्याचे हे एक उत्कृष्ट उदाहरण ठरले आहे.
