जळगाव-लाईव्ह ट्रेंड्स न्यूज प्रतिनिधी । निष्ठा, जबाबदारी आणि कठोर परिश्रम यांमधूनच खऱ्या अर्थाने रुग्णाचे समाधान आणि आनंद मिळतो, असा प्रेरणादायी संदेश गोदावरी फाउंडेशनचे अध्यक्ष तथा माजी खासदार Dr. Ulhas Patil यांनी आपल्या ६६ व्या वाढदिवसानिमित्त विद्यार्थ्यांना दिला. आयुष्यात रोल मॉडेलची भूमिका अत्यंत मोलाची असते, असे सांगत त्यांनी विद्यार्थ्यांना ध्येय निश्चित करून सातत्य राखण्याचा सल्ला दिला.
गोदावरी फाउंडेशन संचलित वैद्यकीय महाविद्यालयातील डॉ. केतकी पाटील सभागृहात वाढदिवस समारंभाचे आयोजन करण्यात आले होते. कार्यक्रमाच्या प्रारंभी विद्यार्थ्यांनी स्वागत गीत सादर केले. त्यानंतर फाउंडेशनअंतर्गत सर्व महाविद्यालयांच्या प्राचार्यांच्या वतीने पुष्पहार अर्पण करून डॉ. उल्हास पाटील यांचा सत्कार करण्यात आला. वैद्यकीय महाविद्यालयाचे डीन व प्राचार्यांच्या उपस्थितीत त्यांनी केक कापून आनंद व्यक्त केला.
सत्काराला उत्तर देताना डॉ. पाटील म्हणाले की, “गतवर्षी याच दिवशी मी मोठ्या शस्त्रक्रियेसाठी मुंबईला गेलो होतो. आजारपणाचा काळ मी सकारात्मकतेने स्वीकारला. त्यानंतर अपार परिश्रम घेतल्यामुळे आज पुन्हा ठणठणीत उभा आहे.” समाजाशी सतत संवाद ठेवणे, ध्येय निश्चित करणे आणि त्यात सातत्य राखणे हे यशाचे गमक असल्याचे त्यांनी अधोरेखित केले. ७०० स्क्वेअर फुटात सुरू केलेल्या क्लिनिकपासून आज ‘गोदावरी’ या आईच्या नावाने उभ्या राहिलेल्या वटवृक्षापर्यंतचा प्रवास त्यांनी विद्यार्थ्यांसमोर मांडला.
आपल्या बालपणीच्या आठवणी सांगताना त्यांनी सांगितले की, आईने विचारलेल्या प्रश्नाला उत्तर देताना आपण Yashwantrao Chavan यांचे नाव रोल मॉडेल म्हणून घेतले होते. त्यांच्या कार्याचा आदर्श डोळ्यासमोर ठेवल्यामुळेच संस्था उभी राहिली, असे ते म्हणाले. सध्याच्या काळात आर्थिक साक्षरता अत्यंत महत्त्वाची असून भविष्यात एआयचे मोठे आव्हान उभे राहणार आहे. त्यासाठी आंतरराष्ट्रीय दर्जाच्या पुस्तकांचे वाचन करण्याचा सल्लाही त्यांनी विद्यार्थ्यांना दिला.
कार्यक्रमात वैद्यकीय महाविद्यालयाचे संचालक डॉ. एन.एस. आर्विकर, डीन डॉ. प्रशांत सोळंके, हृदयविकार तज्ज्ञ डॉ. वैभव पाटील, प्राचार्य पंकज शर्मा यांनीही मनोगत व्यक्त केले. सांस्कृतिक कार्यक्रमांच्या माध्यमातून विद्यार्थ्यांनी नृत्य व गीत सादर करत वातावरण भारावून टाकले. रजिस्ट्रार प्रमोद भिरूड यांनी ‘जाने किस रूप में नारायण मिल जाए’, तर प्रा. पियूष वाघ यांनी ‘तो चलूं’ हे गीत सादर केले. यावेळी रुग्णालयाचे वैद्यकीय अधीक्षक डॉ. प्रेमचंद पंडित लिखित ‘प्रेमवाणी’ या पुस्तकाचे प्रकाशन डॉ. उल्हास पाटील यांच्या हस्ते करण्यात आले.
कार्यक्रमास प्राचार्य डॉ. जयवंत नागूलकर, डॉ. हर्षल बोरोले, डॉ. मिलिंद जोशी, डॉ. चंद्रय्या कांते, डॉ. दीपक अग्रवाल, डॉ. नितू पाटील, डॉ. माया आर्विकर, प्राचार्या विशाखा गणवीर, डॉ. अनंत बेंडाळे, डॉ. पंकज बेंडाळे, डॉ. केतकी पाटील स्कूल ऑफ नर्सिंगचे प्राचार्य शिवानंद बिरादर, प्रशासन अधिकारी प्रविण कोल्हे, राहुल गिरी यांच्यासह मान्यवर उपस्थित होते.
