जळगाव लाईव्ह ट्रेंडस न्यूज प्रतिनिधी । जळगाव शहरातील एका भागात राहणाऱ्या एका १२ वर्षीय अल्पवयीन मुलीचा हात पकडून तिचा विनयभंग केल्याचा धक्कादायक प्रकार मंगळवारी ११ नोव्हेंबर रोजी रात्री ८ वाजता घडला आहे. याप्रकरणी बुधवारी १२ नोव्हेंबर रोजी सायंकाळी ६ वाजता जळगाव तालुका पोलीस ठाण्यात तरूणावर गुन्हा दाखल करण्यात आला असून त्याला अटक करण्यात आली आहे.
पिडीत मुलीच्या आईने दिलेल्या फिर्यादीनुसार, त्यांची १२ वर्षाची मुलगी ही राहत असलेल्या अपार्टमेंट येथे मंगळवारी ११ नोव्हेंबर रोजी रात्री ८ वाजेच्या सुमारास जीन्यात उभी असतांना संशयित आरोपी विशाल संभाजी पाटील वय २३ रा. मुंदाणे ता. पारोळा याने पिडीत मुलीचा हात पकडून तिला लज्जा उत्पन्न होईल असे कृत्य करून विनयभंग केला. हा प्रकार घडल्यानंतर पिडीत मुलीने घडलेला प्रसंग आपल्या आईजवळ सांगितला. त्यानुसार पिडीत मुलीच्या आईने जळगाव तालुका पोलीस ठाण्यात धाव घेवून तक्रार दिली. त्यानुसार पोलीस ठाण्यात संशयित आरोपी विशाल संभाजी पाटील वय २३ रा. मुंदाणे ता.पारोळा याच्या विरोधात गुन्हा दाखल करण्यात आला. गुन्हा दाखल होताच त्याला अटक करण्यात आली आहे. पुढील तपास सहाय्यक पोलीस निरीक्षक अनंत अहिरे हे करीत आहे.
