भुसावळ – लाईव्ह ट्रेंड्स न्यूज प्रतिनिधी । भुसावळ तालुक्यातील वरणगाव येथील ऑर्डनन्स फॅक्टरी येथे कौटुंबिक वादातून प्रौढ व्यक्तीला पत्नी व मुलाकडून काठीने बेदम मारहाण करून दुखापत केल्याची घटना घडली आहे. याप्रकरणी गुरुवार १० ऑगस्ट रोजी दुपारी २ वाजता वरणगाव पोलीस ठाण्यात गुन्हा दाखल करण्यात आला आहे.
वरणगाव पोलिसांनी दिलेली माहिती अशी की, विनोद प्रल्हाद तायडे (वय-४१) रा.काहूरखेडा ता. भुसावळ हे ६ ऑगस्ट रोजी सायंकाळी साडेसात वाजता वरणगाव येथील ऑर्डनन्स फॅक्टरी येथे राहणाऱ्या पत्नी शारदा विनोद तायडे व मुलगा रोहित विनोद तायडे यांच्यात विनोद तायडे यांचा कौटुंबिक कारणावरून वाद झाला. यात विनोद तायडे यांना पत्नी व मुलाने काठीने मारहाण करून गंभीर दुखापत करत शिवीगाळ केली. हा प्रकार घडल्यानंतर विनोद तायडे यांना भुसावळ ग्रामीण रुग्णालयात उपचारासाठी दाखल करण्यात आले. गुरुवार १० ऑगस्ट रोजी दुपारी २ वाजता विनोद तायडे यांनी वरणगाव पोलिसात धाव घेऊन तक्रार दिली. त्यानुसार पत्नी शारदा विनोद तायडे व मुलगा रोहित विनोद तायडे या दोघांवर मारहाण केल्याप्रकरणी वरणगाव पोलीस ठाण्यात गुन्हा दाखल करण्यात आला आहे या घटनेचा पुढील तपास पोलीस नाईक नवीन अली सय्यद करीत आहे.
