जळगाव-लाईव्ह ट्रेंड्स न्यूज प्रतिनिधी । जिल्ह्यात एलपीजी गॅस सिलेंडर तसेच पेट्रोल-डिझेल इंधनाच्या तुटवड्याबाबत पसरत असलेल्या अफवांच्या पार्श्वभूमीवर जिल्हा प्रशासनाने स्पष्ट भूमिका घेत नागरिकांना दिलासा दिला आहे. जिल्हाधिकारी रोहन घुगे यांच्या अध्यक्षतेखाली झालेल्या आढावा बैठकीत जिल्ह्यात गॅस आणि इंधनाचा पुरेसा साठा उपलब्ध असून पुरवठा सुरळीत सुरू असल्याचे स्पष्ट करण्यात आले. त्यामुळे नागरिकांनी कोणत्याही अफवांवर विश्वास न ठेवता शांत राहावे, असे आवाहन प्रशासनाकडून करण्यात आले आहे.
जिल्हाधिकारी कार्यालयात पार पडलेल्या या बैठकीस प्रभारी जिल्हा पुरवठा अधिकारी अर्चना मोरे, सहाय्यक जिल्हा पुरवठा अधिकारी उमा खापरे, सर्व गॅस एजन्सी धारक, पेट्रोल पंप डीलर्स, तेल कंपन्यांचे विक्री अधिकारी आणि संबंधित विभागांचे प्रतिनिधी उपस्थित होते. बैठकीत एलपीजी गॅस सिलेंडरच्या सध्याच्या साठ्याचा सविस्तर आढावा घेण्यात आला. भविष्यातील मागणी लक्षात घेऊन पुरवठ्याचे नियोजन कसे करावे, यावरही चर्चा करण्यात आली. शासनाने ठरवलेल्या प्राधान्यक्रमानुसारच गॅसचे वितरण करण्यात यावे, असे स्पष्ट निर्देश देण्यात आले.
याशिवाय, केटरिंग व्यवसाय, हॉटेल उद्योग आणि एमआयडीसीमधील औद्योगिक घटकांना येणाऱ्या अडचणींचाही आढावा घेण्यात आला. त्यांच्या गरजेनुसार गॅस पुरवठा सुरळीत ठेवण्यासाठी सकारात्मक उपाययोजना करण्याचे संकेत देण्यात आले. औद्योगिक आणि व्यावसायिक क्षेत्रात इंधन पुरवठा खंडित होऊ नये, यासाठी प्रशासनाने विशेष लक्ष देण्याचे ठरवले आहे.
पेट्रोल आणि डिझेलच्या साठ्याबाबतही बैठकीत समाधानकारक माहिती समोर आली. जिल्ह्यात इंधनाचा पुरेसा साठा उपलब्ध असून वितरण यंत्रणा सुरळीतपणे कार्यरत असल्याचे अधिकाऱ्यांनी सांगितले. त्यामुळे कोणत्याही प्रकारचा तुटवडा निर्माण होण्याची शक्यता नसल्याचे प्रशासनाने स्पष्ट केले आहे.
दरम्यान, सोशल मीडियावर पसरवल्या जाणाऱ्या चुकीच्या आणि दिशाभूल करणाऱ्या संदेशांमुळे नागरिकांमध्ये भीतीचे वातावरण निर्माण होऊ शकते, याची दखल घेत जिल्हा प्रशासनाने नागरिकांना संयम बाळगण्याचे आवाहन केले आहे. दैनंदिन गरजेनुसारच गॅस व इंधन खरेदी करावी, अनावश्यक गर्दी करू नये किंवा जादा साठा करून ठेवू नये, असेही प्रशासनाने स्पष्टपणे सांगितले आहे.
जिल्हाधिकारी रोहन घुगे यांनी संबंधित विभागांना गॅस व इंधन साठा तसेच वितरण प्रक्रियेवर सतत लक्ष ठेवण्याचे निर्देश दिले आहेत. कोणतीही तांत्रिक अडचण किंवा पुरवठ्यात अडथळा निर्माण झाल्यास ती तातडीने दूर करण्याच्या सूचना देण्यात आल्या आहेत. जिल्ह्यात गॅस व इंधनाचा पुरवठा विनाव्यत्यय आणि पारदर्शक पद्धतीने सुरू ठेवण्यासाठी प्रशासन कटिबद्ध असल्याचेही बैठकीत अधोरेखित करण्यात आले.
