जळगाव-लाईव्ह ट्रेंडस न्यूज प्रतिनिधी । जळगाव शहर महानगरपालिकेचा कारभार अधिक पारदर्शक, लोकाभिमुख आणि प्रभावी व्हावा, या उद्देशाने एक महत्त्वपूर्ण पाऊल उचलण्यात आले आहे. महापौर दीपमाला काळे यांच्या संकल्पनेतून मंगळवारी, २४ मार्च रोजी महापालिकेच्या सभागृहात सर्व ७५ नगरसेवक आणि मनपा अधिकाऱ्यांसाठी विशेष ‘प्रशिक्षण वर्गाचे’ आयोजन करण्यात आले. या उपक्रमाचा मुख्य उद्देश लोकप्रतिनिधींना महापालिकेच्या कामकाजाचे तांत्रिक आणि शास्त्रशुद्ध ज्ञान देणे हा आहे.
कामकाजात येणार अधिक स्पष्टता :
अनेकदा प्रशासकीय गुंतागुंत आणि नियमांच्या माहितीअभावी विकासकामांना विलंब होतो. हे टाळण्यासाठी महापौर दीपमाला काळे यांनी सर्व लोकप्रतिनिधींना एकत्र आणून हे प्रशिक्षण आयोजित केले आहे. या वर्गाच्या माध्यमातून महानगरपालिकेच्या विविध विभागांचे कामकाज, कायदेशीर तरतुदी आणि बजेटचे नियोजन यावर सविस्तर चर्चा केली जाणार आहे.
दीपक करंजीकर यांचे विशेष मार्गदर्शन :
या प्रशिक्षण वर्गासाठी महाराष्ट्रातील प्रसिद्ध वक्ते, लेखक, राजकीय विश्लेषक आणि अर्थव्यवस्थेचे गाढे अभ्यासक दीपक करंजीकर यांची विशेष उपस्थिती लाभली आहे. करंजीकर यांनी आपल्या मार्गदर्शनातून नगरसेवकांना जनतेच्या समस्या सोडवताना प्रशासकीय शिस्त आणि आर्थिक नियोजन कसे असावे, याचे वस्तुनिष्ठ विश्लेषण केले.
लोकाभिमुख प्रशासनावर भर
“केवळ निवडून येणे पुरेसे नसून, जनतेचे प्रश्न तांत्रिक चौकटीत बसवून ते मार्गी लावणे महत्त्वाचे आहे,” असा सूर या कार्यशाळेतून उमटला. या प्रशिक्षणामुळे नगरसेवक आणि अधिकारी यांच्यातील समन्वय वाढून शहराच्या विकासकामांना गती मिळेल, असा विश्वास महापौरांनी व्यक्त केला आहे. या नाविन्यपूर्ण प्रयोगाचे जळगावच्या राजकीय वर्तुळात कौतुक होत आहे.
