जळगाव-लाईव्ह ट्रेंडस न्यूज प्रतिनिधी । जळगाव शहरातील अजिंठा चौफुली परिसरातील ओला इलेक्ट्रिक सर्व्हिस सेंटरसमोरून ई-बाईकची बॅटरी आणि ‘MCU असेंब्ली’ चोरणाऱ्या दोन सराईत चोरट्यांना एमआयडीसी पोलिसांनी जेरबंद केले आहे. पोलिसांनी त्यांच्याकडून ५७ हजार रुपये किमतीचा मुद्देमाल हस्तगत केला आहे.
मिळालेल्या माहितीनुसार, रविवारी ११ जानेवारीच्या रात्री अजिंठा चौफुली येथील ओला सर्व्हिस सेंटरच्या समोरील मोकळ्या जागेतून अज्ञात चोरट्यांनी ओला कंपनीची मौल्यवान बॅटरी आणि तांत्रिक भाग चोरून नेले होते. याप्रकरणी २० जानेवारी रोजी एमआयडीसी पोलीस ठाण्यात गुन्हा दाखल करण्यात आला होता. घटनेचे गांभीर्य ओळखून पोलीस निरीक्षक बबन आव्हाड यांनी तातडीने गुन्हे शोध पथकाची नियुक्ती केली. उपनिरीक्षक राहुल तायडे, चंद्रकांत धनके आणि त्यांच्या टीमने शहरातील विविध ठिकाणचे सीसीटीव्ही फुटेज तपासले.
गुप्त बातमीदाराकडून मिळालेल्या माहितीनुसार, पोलिसांनी अब्देअली शब्बीर नगरी (वय २८, रा. शिवाजीनगर) आणि साकीब खान सिकलगर (वय २२, रा. सालारनगर) या दोघांना ताब्यात घेतले. त्यांची सखोल चौकशी केली असता त्यांनी चोरीची कबुली दिली. पोलिसांनी त्यांच्याकडून एकूण ५७ हजार रुपयांचा मुद्देमाल जप्त केला आहे. ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, आणि उपअधीक्षक नितीन गणापुरे यांच्या मार्गदर्शनाखाली यशस्वी झाली. या प्रकरणाचा पुढील तपास पोलीस कर्मचारी गिरीश पाटील आणि निलेश पाटील करत आहेत.
