अमळनेर-लाईव्ह ट्रेंडस न्यूज प्रतिनिधी । अमळनेर शहरातील बसस्थानक परिसरात दुकानासमोर लावलेली दुचाकी बाजूला काढण्यास सांगितल्याच्या कारणावरून एका व्यक्तीला शिवीगाळ करत चापटा-बुक्क्यांनी बेदम मारहाण केल्याची घटना ३० जुलै रोजी सायंकाळी ५.३० वाजता घडली आहे. या प्रकरणी शुक्रवारी १ ऑगस्ट रोजी दुपारी ३.३० वाजता अमळनेर पोलीस ठाण्यात एकावर अदखलपात्र गुन्हा दाखल करण्यात आला आहे.
पोलिसांनी दिलेल्या माहितीनुसार, अश्फाक इस्माईल लोहार (वय ५२, रा. तांबेपुरा, अमळनेर) हे आपल्या कुटुंबासह वास्तव्यास आहेत. जुन्या बसस्थानकाजवळ असलेल्या त्यांच्या दुकानासमोर संशयित आरोपी अंबर पांचाळ (पूर्ण नाव माहीत नाही) याने आपली दुचाकी अडथळा निर्माण होईल अशा पद्धतीने लावली होती. अश्फाक यांनी अंबरला दुचाकी बाजूला काढण्यास सांगितले. याचा राग आल्याने अंबर पांचाळने अश्फाकला शिवीगाळ केली आणि चापटा-बुक्क्यांनी बेदम मारहाण करत गंभीर दुखापत केली. तसेच, जीवे ठार मारण्याची धमकीही दिली, असे तक्रारीत म्हटले आहे.
ही घटना घडल्यानंतर अश्फाक लोहार यांनी अमळनेर पोलिसांत तक्रार दिली. त्यानुसार, अंबर पांचाळ याच्या विरोधात अदखलपात्र गुन्हा दाखल करण्यात आला आहे. या प्रकरणाचा पुढील तपास पोलीस कॉन्स्टेबल विनोद सोनवणे करत आहेत.
