जळगाव-लाईव्ह ट्रेंडस न्यूज प्रतिनिधी । शहर आणि ग्रामीण भागात वीजचोरीसारख्या घटनांना आळा घालण्यासाठी महावितरणकडून व्यापक मोहीम राबवण्यात आली आहे. शनिवारी ११ जानेवारी रोजी या मोहिमेअंतर्गत ३८ पथकांनी वीजचोरी करणाऱ्या १८५ प्रकरणांवर कठोर कारवाई केली, तर १७५ वीज मीटरमध्ये फेरफार केल्याचे आढळून आले.
महावितरणचे कार्यकारी संचालक धनंजय आँढेकर यांच्या मार्गदर्शनाखाली जळगाव विभागात २८ कक्षांमध्ये वीजचोरीविरोधी विशेष मोहीम राबवली गेली. जळगाव शहरासह नशिराबाद, असोदा, म्हसावद आणि इतर ठिकाणी वीजचोरीचे प्रकार उघडकीस आले. महावितरणच्या पथकांनी या मोहिमेदरम्यान वीज मीटरमध्ये छेडछाड करून आकडे टाकून वीजचोरी होत असल्याचे निदर्शनास आणले आणि ही मीटर जप्त केली.
महावितरणच्या जळगाव विभागाचे प्रभारी कार्यकारी अभियंता गोपाळ महाजन यांनी या मोहिमेबाबत सांगितले, “अनधिकृत वीजवापर रोखण्यासाठी अधिकृत वीज जोडणी आवश्यक आहे. नागरिकांनी लवकरात लवकर वीज चोरी थांबवून अधिकृत जोडणीसाठी पुढाकार घ्यावा. वीज चोरीमुळे केवळ आर्थिक तोटा नाही तर तांत्रिक यंत्रणेलाही हानी पोहोचते.”
या मोहिमेदरम्यान जप्त करण्यात आलेल्या १७५ संशयास्पद वीज मीटरची तपासणी सुरू आहे. महावितरणने ग्राहकांना वीज चोरी टाळण्यासाठी प्रोत्साहित करत योग्य मार्गदर्शन केले आहे. विशेष म्हणजे, या मोहिमेत महावितरणच्या ३८ पथकांनी एकत्रित काम करत वीजचोरी रोखण्यासाठी कठोर पावले उचलली. या कारवाईमुळे जळगाव शहर आणि ग्रामीण भागातील वीजचोरीला आळा बसला असून, भविष्यात अशा प्रकारांवर अधिक कठोर कारवाई केली जाणार असल्याचे महावितरणच्या अधिकाऱ्यांनी स्पष्ट केले. महावितरणच्या या कठोर पावलांमुळे वीजचोरी करणाऱ्यांना धडा मिळाला असून, वीज चोरीच्या प्रकरणांमध्ये मोठी घट होण्याची शक्यता वर्तवली जात आहे.
