जळगाव-लाईव्ह ट्रेंड्स न्यूज प्रतिनिधी । राज्याचे उपमुख्यमंत्री तथा ज्येष्ठ आणि अनुभवी नेते अजितदादा पवार यांच्या दुर्दैवी विमान अपघाती निधनाने महाराष्ट्राच्या राजकारणात मोठी पोकळी निर्माण झाली असून, या घटनेने संपूर्ण राज्य शोकसागरात बुडाले आहे. या पार्श्वभूमीवर जळगावचे पालकमंत्री गुलाबराव पाटील यांनी तीव्र दुःख व्यक्त करत अजितदादा पवार यांना भावपूर्ण श्रद्धांजली अर्पण केली आहे.
पालकमंत्री गुलाबराव पाटील यांनी आपल्या शोकसंदेशात म्हटले आहे की, अजितदादा पवार यांचे निधन ही अत्यंत धक्कादायक, वेदनादायक आणि मन हेलावून टाकणारी घटना आहे. महाराष्ट्राने एक कणखर, अनुभवी आणि विकासाभिमुख नेतृत्व गमावले असून, त्यांच्या जाण्याने निर्माण झालेली पोकळी सहज भरून निघणारी नाही, अशी भावना त्यांनी व्यक्त केली.
अजितदादा पवार हे वक्तशीरपणा, ठाम निर्णयक्षमता आणि प्रशासनावर असलेली मजबूत पकड यासाठी संपूर्ण राज्यात ओळखले जात होते. सभागृहातील त्यांचे शिस्तबद्ध वर्तन, निर्णय घेताना दाखवलेली स्पष्टता आणि सर्वसामान्य जनतेबद्दल असलेली आपुलकी ही त्यांच्या व्यक्तिमत्त्वाची ठळक वैशिष्ट्ये होती. राज्याच्या विकासासाठी असलेली त्यांची तळमळ आणि कामाची गती अनेकांसाठी प्रेरणादायी होती, असेही गुलाबराव पाटील यांनी नमूद केले.
विरोधकांनाही सन्मानाने वागवणारे, राजकारणात दिलदारपणा जपणारे नेतृत्व म्हणून अजितदादा पवार यांची वेगळी ओळख होती. बारामतीचे किल्लेदार म्हणून ओळख असली तरी ते केवळ आपल्या मतदारसंघापुरते मर्यादित राहिले नाहीत, तर संपूर्ण महाराष्ट्राच्या विकासासाठी सातत्याने कार्यरत राहिले. राज्याच्या प्रगतीसाठी त्यांनी घेतलेले धाडसी निर्णय आणि दिलेले योगदान हे कायम स्मरणात राहील, असे मत पालकमंत्र्यांनी व्यक्त केले.
या दुःखद घटनेमुळे पवार कुटुंबीयांवर मोठा आघात झाला असून, त्याचबरोबर संपूर्ण महाराष्ट्रावर शोककळा पसरली आहे. अजितदादा पवार यांच्या जाण्याने राज्याच्या राजकारणात निर्माण झालेली पोकळी दीर्घकाळ जाणवत राहील, अशी भावना नागरिकांमधूनही व्यक्त होत आहे.
दिवंगत आत्म्यास सद्गती लाभो तसेच पवार कुटुंबीयांना, त्यांच्या सहकाऱ्यांना आणि असंख्य समर्थकांना हे अपार दुःख सहन करण्याची शक्ती मिळो, अशी ईश्वरचरणी प्रार्थना करत पालकमंत्री गुलाबराव पाटील यांनी अजितदादा पवार यांना भावपूर्ण श्रद्धांजली अर्पण केली आहे.
