वॉशिंग्टन–लाईव्ह ट्रेंड्स न्यूज वृत्तसेवा । जगभरातील तणावपूर्ण भू-राजकीय परिस्थितीच्या पार्श्वभूमीवर, ग्लोबल फायरपॉवरने २०२५ सालासाठी जगातील सर्वात शक्तिशाली सैन्य असलेल्या देशांची नवी रँकिंग जाहीर केली आहे. १४५ देशांच्या संरक्षणक्षमता, मनुष्यबळ, आर्थिक स्थैर्य आणि शस्त्रसामग्री यावर आधारित या अहवालात अमेरिकेने पुन्हा एकदा पहिला क्रमांक पटकावला आहे. भारताने आपली दमदार उपस्थिती नोंदवत जगातील चौथ्या क्रमांकाचं सर्वाधिक शक्तिशाली सैन्य असल्याचं सिद्ध केलं आहे.
ग्लोबल फायरपॉवर इंडेक्सनुसार, अमेरिकेचा पॉवर इंडेक्स स्कोअर ०.०७४४ इतका आहे — जो सर्व देशांच्या तुलनेत शून्यच्या सर्वाधिक जवळ असून सर्वोत्तम मानला जातो. ८७३ अब्ज डॉलरहून अधिक संरक्षण बजेटसह अमेरिकेने आपले वर्चस्व कायम ठेवले आहे. अत्याधुनिक हत्यारे, तंत्रज्ञान आणि जगभरातील तळांच्या जाळ्यामुळे अमेरिका अजूनही जगाची ‘सैन्य महासत्ता’ म्हणून ओळखली जाते.
रशियाला या यादीत दुसरे स्थान मिळाले आहे. ०.०७८८ इंडेक्ससह रशिया आण्विक शस्त्रसाठा, टँक, फायटर जेट्स आणि हेलिकॉप्टरच्या मोठ्या संख्येमुळे जागतिक पातळीवर भक्कम उपस्थिती राखून आहे. पारंपरिक आणि आण्विक दोन्ही क्षेत्रांत तो अजूनही अमेरिकेनंतरचा सर्वात शक्तिशाली देश मानला जातो.
या यादीत चीन तिसऱ्या स्थानावर आहे. ०.०७८८ इंडेक्ससह चीनने आपल्या वेगाने वाढणाऱ्या संरक्षण उद्योग, मोठ्या नौदल ताफ्याने आणि सायबर युद्ध क्षमतांनी स्थान बळकट केलं आहे. भारताचा शेजारी असलेला हा देश आशियातील सैन्य क्षेत्रातील प्रमुख प्रतिस्पर्धी मानला जातो.
भारताने ०.११८४ इंडेक्ससह चौथा क्रमांक मिळवला आहे. भारतीय सैन्याने आपल्या मानवी संसाधनांमुळे आणि तांत्रिक प्रगतीमुळे जगातील मोठ्या सैन्य शक्तींमध्ये आपलं स्थान टिकवून ठेवलं आहे. लोकसंख्या आणि सैनिकी वयोमानानुसार भारताची जनशक्ती प्रचंड असून, श्रमशक्ती आणि अर्धसैनिक दलाच्या बाबतीत भारत जगात दुसऱ्या स्थानावर आहे. स्थळ, वायू आणि नौदल या तिन्ही दलांचा संतुलित विकास आणि ‘मेक इन इंडिया’ उपक्रमांतर्गत वाढणारी स्वदेशी शस्त्रनिर्मिती यामुळे भारताचं स्थान अधिक मजबूत झालं आहे.
दक्षिण कोरिया पाचव्या, ब्रिटन सहाव्या, फ्रान्स सातव्या, जपान आठव्या, तुर्की नवव्या आणि इटली दहाव्या स्थानावर आहे. विशेष म्हणजे, भारताचा शेजारी आणि पारंपरिक प्रतिस्पर्धी पाकिस्तान टॉप १० मध्ये नाही. पाकिस्तानला १२व्या क्रमांकावर स्थान मिळालं असून, त्याचा इंडेक्स ०.२५१३ इतका आहे — जो भारताच्या तुलनेत खूपच कमकुवत आहे. पाकिस्तानकडे काही प्रमाणात लढाऊ विमाने, टँक आणि मिसाईल प्रणाली असली तरी, त्याच्या आर्थिक आणि तांत्रिक क्षमतांमुळे तो मागे राहिल्याचं विश्लेषणात नमूद करण्यात आलं आहे.
