जळगाव प्रतिनिधी । अयोध्या नगरजवळ असणार्‍या सदगुरू नगरातील तरूणाने मध्यरात्रीच्या सुमारास गळफास घेऊन आत्महत्या केल्याची घटना घडली आहे.
याबाबत माहिती अशी की, हर्षल प्रेमनाथ महाजन (वय २९, राहणार सद्गुरु नगर, अयोध्या नगर जवळ, जळगाव) हा तरुण आई-वडील पत्नी आणि भावासह राहतो. तो खासगी कंपनीत कामाला असून एकत्रित कुटुंबात राहतात. हर्षल महाजन हा काल आई वडिलांसह रात्री १० वाजता जेवण करून झोपला. मध्यरात्री घरात सर्वजण झोपलेले असताना हर्षलने दोरीच्या सहाय्याने गळफास घेऊन आत्महत्या केली. पहाटे साडेतीन वाजेच्या सुमारास वडील प्रेमनाथ एकनाथ महाजन यांना आपल्या मुलाने आत्महत्या केल्याचे दिसून आले. मुलाचा मृतदेह पाहून घरातील कुटुंबीयांनी हंबरडा फोडला.
दरम्यान, मृत हर्षल महाजन याचे पार्थिव शासकीय वैद्यकीय महाविद्यालयात नेण्यात आले असून शवविच्छेदन करून मृतदेह नातेवाइकांच्या ताब्यात देण्यात आला आहे. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आले आहे, पुढील तपास पोलिस कर्मचारी करीत आहे.
