जळगाव-लाईव्ह ट्रेंड्स न्यूज प्रतिनिधी । जळगाव महापालिका निवडणुकीच्या प्रक्रियेत दिवसेंदिवस गती येत असून आज शनिवारी उमेदवारी अर्ज दाखल करण्याच्या टप्प्यात लक्षणीय हालचाल पाहायला मिळाली. आजच्या एकाच दिवशी तब्बल २४ उमेदवारी अर्ज दाखल झाले असून २३५ इच्छुक उमेदवारांनी अर्जांची खरेदी केल्याने महापालिका निवडणुकीची रंगत वाढत चालली आहे.
निवडणूक शाखेकडून प्राप्त माहितीनुसार, आज प्रभागनिहाय अर्ज विक्री मोठ्या प्रमाणावर झाली. प्रभाग क्रमांक १ मधून १०, प्रभाग क्रमांक २ मधून २६, प्रभाग क्रमांक ३ मधून १२, प्रभाग क्रमांक ४ मधून १५, प्रभाग क्रमांक ५ मधून ६, प्रभाग क्रमांक ६ मधून १५, प्रभाग क्रमांक ७ मधून २, प्रभाग क्रमांक ८ मधून ६, प्रभाग क्रमांक ९ मधून १२, प्रभाग क्रमांक १० मधून ८, प्रभाग क्रमांक ११ मधून १३, प्रभाग क्रमांक १२ मधून ११, प्रभाग क्रमांक १३ मधून २३, प्रभाग क्रमांक १४ मधून १४, प्रभाग क्रमांक १५ मधून ७, प्रभाग क्रमांक १६ मधून १४, प्रभाग क्रमांक १७ मधून २१, प्रभाग क्रमांक १८ मधून ८ तर प्रभाग क्रमांक १९ मधून १२ उमेदवारी अर्जांची विक्री झाल्याचे स्पष्ट झाले आहे.
दरम्यान, आज दाखल झालेल्या २४ अर्जांचा विचार करता प्रभाग क्रमांक १ मधून १, प्रभाग क्रमांक २ मधून २, प्रभाग क्रमांक ७ मधून १, प्रभाग क्रमांक १२ मधून ३, प्रभाग क्रमांक १३ मधून ४, प्रभाग क्रमांक १५ मधून ४, प्रभाग क्रमांक १६ मधून ६, प्रभाग क्रमांक १७ मधून १ आणि प्रभाग क्रमांक १८ मधून २ उमेदवारी अर्ज दाखल करण्यात आले आहेत. विविध प्रभागांमधून इच्छुक उमेदवारांचा वाढता प्रतिसाद महापालिका निवडणुकीतील चुरस अधिक तीव्र होत असल्याचे संकेत देत आहे.
राजकीय पक्षांचीदेखील हालचाल वाढली असून भारतीय जनता पक्षाकडून प्रभाग क्रमांक १२ ‘ब’ मधून उज्ज्वला बेंडाळे यांनी आपला उमेदवारी अर्ज दाखल केला आहे. तर प्रभाग क्रमांक १३ मधून शिंदे गटाकडून ज्योती चव्हाण यांनी उमेदवारी अर्ज दाखल केल्याने राजकीय समीकरणे आकार घेऊ लागली आहेत. आगामी दिवसांत आणखी उमेदवार रिंगणात उतरण्याची शक्यता असून अर्ज दाखल करण्याच्या शेवटच्या तारखेपर्यंत मोठी गर्दी अपेक्षित आहे.
