यावल लाईव्ह ट्रेंडस न्यूज प्रतिनिधी । यावल भुसावळ रोडवरील पेट्रोल पंपाजवळ एका दाम्पत्याच्या दुचाकीचे टायर फूटून भीषण अपघात घडला होता. यात शिरसाड येथील दुचाकीस्वार जगदीश अत्तरदे यांचा जागीच मृत्यू झाला होता तर त्यांची पत्नी ह्या गंभीर जखमी झाल्या असता त्यांचा देखील उपचारादरम्यान मृत्यू झाला आहे.
यावल भुसावळ रस्त्यावर शहराच्या बाहेर पेट्रोल पंपाच्या समोर मागील शुक्रवारी १८ ऑक्टोबर रोजी सायंकाळी चार वाजता भुसावळकडून यावलकडे दुचाकी क्रमांक (एमएच १९ एन २४३३) द्वारे जगदीश वासुदेव अत्तरदे (वय-५३) व त्यांची पत्नी हेमलता जगदीश अत्तरदे (वय ४५) हे पती-पत्नी येत असतांना, दरम्यान पेट्रोल पंपाच्याजवळ अचानक त्यांच्याकडील दुचाकीचे पुढील टायर फुटले आणि भरधाव वेगातील दुचाकी थेट रस्त्याच्या कडेला असलेल्या झाडावर जाऊन धडकली. या भीषण अपघातात भुसावळ येथील रहीवाशी जगदिश अत्तरदे हे जागीच ठार झाले होते. तर त्यांची पत्नी हेमलता अत्तरदे ह्या अपघात गंभीररित्या जखमी झाल्या होत्या. त्यांच्यावर खासगी रूग्णालयात उपचार सुरू असतांना त्यांचा देखील उपचारादरम्यान मृत्यू झाला. अतिशय शोकाकुल वातावरणात त्यांच्यावर अंत्यसंस्कार करण्यात आले. या भीषण अपघातात पतीपत्नीचा जीव गमावण्याची वेळ आल्याने शिरसाड गावात सर्वत्र हळहळ व्यक्त केली जात आहे.
