दिल्ली – लाईव्ह ट्रेंड्स न्यूज वृत्तसेवा । भारत आणि अमेरिका यांच्यातील व्यापारी तणाव शिगेला पोहोचण्याची शक्यता आहे. डोनाल्ड ट्रम्प यांच्या भारतविरोधी टॅरिफ धोरणामुळे दोन्ही देशांतील संबंधांमध्ये गढुळपणा निर्माण झाला असून आता भारत सरकारकडून प्रत्युत्तरात्मक उपाययोजना होण्याची चिन्हं दिसत आहेत. अमेरिकेच्या एकतर्फी निर्णयामुळे निर्माण झालेल्या असंतुलनावर भारत जोरदार प्रत्युत्तर देणार असल्याचं स्पष्ट होत आहे.
अमेरिकेचे माजी राष्ट्राध्यक्ष डोनाल्ड ट्रम्प यांनी फेब्रुवारी 2025 मध्ये राष्ट्रीय सुरक्षेचा हवाला देत भारतीय स्टील आणि अॅल्युमिनियमवर 25 टक्के टॅरिफ लावण्याचा निर्णय घेतला. भारत सरकारने या निर्णयाविरोधात जागतिक व्यापार संघटना (WTO) मध्ये नाराजी व्यक्त करत औपचारिक नोटीस पाठवली होती. भारताने स्पष्टपणे सांगितले होते की, टॅरिफ मागे न घेतल्यास अमेरिकेला त्याच भाषेत उत्तर दिलं जाईल. मात्र, अमेरिका शांत राहिली आणि चर्चेला तयार न झाल्यामुळे भारतानेही आता कारवाईचा निर्णय घेतल्याचं समजतं.
या निर्णयानंतरही ट्रम्प थांबले नाहीत. जून 2025 मध्ये त्यांनी भारतीय स्टील आणि अॅल्युमिनियमवरील आयात शुल्क थेट 50 टक्क्यांपर्यंत वाढवलं. त्यानंतर 31 जुलै रोजी त्यांनी आणखी एक धक्का देत सर्व प्रकारच्या भारतीय वस्तूंवर 25 टक्के टॅरिफ लावण्याची घोषणा केली. विशेष म्हणजे, भारत रशियाकडून तेल खरेदी करत असल्याच्या कारणावरून अमेरिकेने आणखी 25 टक्के टॅरिफ लावलं, ज्यामुळे एकूण टॅरिफचा भार 50 टक्क्यांवर पोहोचला आहे.
या पार्श्वभूमीवर, भारत आता निवडक अमेरिकन वस्तूंवर ‘Retaliatory Tariffs’ अर्थात प्रत्युत्तरात्मक शुल्क लावण्याच्या तयारीत आहे. एचटीच्या वृत्तानुसार, भारत सरकारने संभाव्य टॅरिफ यादी तयार केली असून लवकरच त्याची अधिकृत घोषणा होण्याची शक्यता आहे. भारताच्या या हालचालीमुळे ट्रम्प प्रशासनासमोर मोठं आव्हान उभं राहण्याची शक्यता आहे, कारण भारत अमेरिकेचा एक महत्त्वाचा व्यापार भागीदार मानला जातो.
या संपूर्ण घडामोडींमुळे भारत आणि अमेरिकेतील व्यापारी संबंधांवर गंभीर परिणाम होण्याची शक्यता आहे. जर दोन्ही देशांनी यावर तोडगा काढला नाही तर याचा फटका दोघांनाही बसू शकतो. ट्रम्प यांच्या आक्रमक धोरणाला भारत आता डोळ्यात डोळा घालून उत्तर देणार आहे, हे जवळपास निश्चित मानलं जात आहे.
