जळगाव-लाईव्ह ट्रेंडस न्यूज प्रतिनिधी । जळगाव तालुक्यातील वसंतवाडी येथील ग्रामपंचायत सदस्य प्रदीप ज्ञानेश्वर पाटील यांनी सार्वजनिक जागेवर केलेले बेकायदेशीर अतिक्रमण तातडीने काढून टाकावे आणि त्यांचे सदस्य पद रद्द करावे, अशी मागणी शिवसेना (ठाकरे गट) जिल्हाध्यक्ष कुलभूषण पाटील यांनी जिल्हाधिकाऱ्यांकडे केली आहे. प्रदिप पाटील यांनी पदाचा गैरवापर करून हे अतिक्रमण केल्याचा आरोप निवेदनातून करण्यात आला आहे. यामुळे गावातील सोयी-सुविधांवर परिणाम होत असून, ग्रामस्थांना अनेक अडचणींचा सामना करावा लागत आहे.
सार्वजनिक जागांवर बेकायदेशीर अतिक्रमण
निवेदनात म्हटले आहे की, ग्रामपंचायत सदस्य प्रदिप पाटील यांनी गावातील सार्वजनिक जागेवर आणि ग्रामपंचायतीच्या मालकीच्या जागेवर अतिक्रमण केले आहे. यामुळे ग्रामस्थांना गावातील सोयी-सुविधांचा योग्य वापर करता येत नाही. तसेच, रस्त्यांवरील वाहतुकीलाही अडथळा निर्माण झाला आहे. याबद्दल अनेकदा ग्रामपंचायत आणि ग्रामसेवकांकडे तोंडी तक्रारी करूनही कोणतीही कारवाई झालेली नाही, त्यामुळे ग्रामस्थांमध्ये तीव्र नाराजी पसरली आहे. या समस्येची दखल घेऊन तातडीने अतिक्रमण काढण्याचे आदेश देण्याची विनंती निवेदनात करण्यात आली आहे.
नाल्यांवरही बेकायदेशीर बांधकाम
प्रदीप पाटील यांनी केवळ सार्वजनिक जागेवरच नव्हे, तर जळके-एरंडोल रस्त्यावरील नदी-नाल्यांच्या बांधांवरही बांधकाम केल्याचा आरोप आहे. त्यांनी नाल्यावर माती व इतर साहित्य टाकून पक्क्या पत्र्यांचे मोठे शेड उभारले आहे. यात हार्डवेअर आणि तंबूचे सामान भरून त्यांनी सार्वजनिक जागेचा गैरवापर केला आहे. याशिवाय, त्यांच्या स्वतःच्या राहत्या घराचेही ७/१२ उताऱ्यावरील नमूद क्षेत्रापेक्षा अधिक बांधकाम केले आहे, ज्यामुळे येणाऱ्या-जाणाऱ्या लोकांना गैरसोय होत आहे. हे सर्व बांधकाम बेकायदेशीर असून, ते तात्काळ हटवावे, अशी मागणी करण्यात आली आहे.
सदस्यपद रद्द करण्याची मागणी
कुलभूषण पाटील यांनी आपल्या निवेदनात म्हटले आहे की, ग्रामपंचायत सदस्य प्रदिप पाटील यांनी आपल्या पदाचा गैरवापर केला आहे. अधिकाऱ्यांना धमकावून त्यांनी सत्तेचा दुरुपयोग केला असून, त्यामुळे त्यांचे ग्रामपंचायत सदस्य पद त्वरित रद्द करावे. हे बेकायदेशीर अतिक्रमण लवकरात लवकर काढून टाकण्याचे आदेश जिल्हाधिकाऱ्यांनी द्यावेत. जर या प्रकरणी तात्काळ लक्ष दिले नाही, तर भविष्यात हे प्रकरण अधिक गंभीर बनू शकते. पदाचा गैरवापर आणि बेकायदेशीर अतिक्रमण या दोन्ही बाबी गंभीर असल्याने यावर त्वरित कार्यवाही होणे अपेक्षित आहे.
