अमळनेर-लाईव्ह ट्रेंडस न्यूज प्रतिनिधी ।अमळनेर तालुक्यातील जैतपीर येथील एका विवाहितेचा छळ करून, दोन लाख रुपयांसाठी तिच्या मुलांना हिसकावून तिला घरातून हाकलून दिल्याचा धक्कादायक प्रकार समोर आला आहे. या प्रकरणी विवाहितेच्या तक्रारीवरून मंगळवारी २६ ऑगस्ट रोजी दुपारी ३.३० वाजता मारवड पोलीस ठाण्यात पतीसह सासरच्या पाच जणांविरोधात गुन्हा दाखल करण्यात आला आहे.
दोन लाखांसाठी छळ आणि घरातून हाकलले
अमळनेर तालुक्यातील जैतपीर येथील माहेर असलेल्या भाग्यश्री अजय चौधरी (वय २५, अंदाजे) हिचे लग्न २०१८ मध्ये मध्य प्रदेशातील खेतिया येथील अजय प्रकाश चौधरी यांच्याशी झाले होते. लग्नानंतर काही काळानंतर सासरच्या मंडळींनी तिला माहेराहून पैसे आणण्यासाठी तगादा लावला. भाग्यश्रीने पैसे आणण्यास नकार दिल्याने सासरच्या मंडळींनी तिचा मानसिक आणि शारीरिक छळ सुरू केला. दोन लाख रुपये माहेराहून आणले नाही म्हणून तिचा पती, सासू आणि सासऱ्याने तिला वारंवार त्रास दिला.
मुलगा आणि मुलीसह घरातून काढले
पैसे न मिळाल्याच्या रागातून सासरच्या मंडळींनी क्रूरतेची हद्द पार केली. पती अजय चौधरी, सासू मीराबाई, सासरे प्रकाश चौधरी यांनी तिचे दोन्ही मुलांना हिसकावून घेत तिला घरातून हाकलून दिले. “जोपर्यंत माहेराहून दोन लाख रुपये आणत नाहीस, तोपर्यंत तुला घरात नांदण्यासाठी परत आणणार नाही,” अशी धमकीही तिला देण्यात आली. या प्रकारामुळे भाग्यश्री पूर्णपणे खचून गेली होती.
पोलिसांत तक्रार, पाच जणांवर गुन्हा दाखल
सासरच्या मंडळींकडून होणारा छळ असह्य झाल्यामुळे अखेर भाग्यश्रीने धाडसाने मारवड पोलीस ठाण्यात तक्रार दाखल केली. तिच्या फिर्यादीवरून पोलिसांनी पती अजय प्रकाश चौधरी, सासू मीराबाई चौधरी, सासरे प्रकाश हिरामण चौधरी, जेठ विजय उर्फ भूषण चौधरी (सर्व रा. खेतिया, मध्य प्रदेश) आणि नणंद सोनाली सुनील सूर्यवंशी (रा. अक्कलकुवा, नंदुरबार) यांच्या विरोधात गुन्हा दाखल केला आहे. पुढील तपास पोलीस हेड कॉन्स्टेबल मुकेश साळुंखे करत आहेत.
