जळगाव-लाईव्ह ट्रेंडस न्यूज प्रतिनिधी । जळगाव शहरातील बिबा नगर येथील माहेर असलेल्या विवाहितेला सासरी भडगाव येथे २ लाखांची मागणी करत मारहाण करून छळ केल्याचा प्रकार समोर आला आहे. या संदर्भात मंगळवारी ११ जून रोजी रात्री ९ वाजता जळगाव तालुका पोलीस ठाण्यात पतीसह सासरच्या मंडळी विरोधात गुन्हा दाखल करण्यात आला आहे.
याबाबत अधिक माहिती अशी की, जळगाव शहरातील बिबा नगर येथील माहेर असलेल्या पुनम भूषण पाटील वय 25 यांचा विवाह भडगाव येथील भूषण सुरेश पाटील यांच्याशी रीतीरीवाजानूसार झालेला आहे. लग्नाच्या एक महिन्यानंतर विवाहितेला लहान सहान कारणांवरून टोमणे मारणे सुरू झाले. त्यानंतर तिला माहेराहून २ लाख रुपये आणावे अशी मागणी केली. दरम्यान विवाहितेने पैसे आणले नाही, म्हणून तिला शिवीगाळ करत मारहाण करण्यात आली. तसेच तिचे सासू, सासरे, दिर आणि चुलत सासरे यांनी देखील छळ केला. हा प्रकार सहन न झाल्याने विवाहिता माहेरी बिबा नगर येथे निघून आल्या. दरम्यान याप्रकरणी त्यांनी मंगळवारी ११ जून रोजी रात्री ९ वाजता जळगाव तालुका पोलिसात धाव घेवून तक्रार दिली. त्यानुसार पती भूषण सुरेश पाटील, सासरे सुरेश दाजीबा पाटील, सासू संगीता सुरेश पाटील, दीर प्रवीण सुरेश पाटील आणि चुलत सासरे सुनील दाजीबा पाटील सर्व राहणार भडगाव यांच्या विरोधात जळगाव तालुका पोलिसात गुन्हा दाखल करण्यात आला आहे. या घटनेचा पुढील तपास पोलीस हेडकॉन्स्टेबल धनराज पाटील हे करीत आहे.
