यावल–लाईव्ह ट्रेंड्स न्यूज प्रतिनिधी । कोरपावली येथे सर्वधर्मीय ऐक्याचे जिवंत प्रतीक मानल्या जाणाऱ्या हजरत पिर गैबंशाह वली (रहे.) यांच्या दर्ग्यावर सालाबादप्रमाणे होणाऱ्या उर्स निमित्त भव्य कव्वाली महोत्सवाचे आयोजन करण्यात आले असून, या निमित्ताने परिसरात श्रद्धा, भक्ती आणि सौहार्दाचे वातावरण निर्माण झाले आहे. हिंदू–मुस्लीम तडवी पंच कमिटीच्या वतीने आयोजित या कार्यक्रमाकडे भाविकांमध्ये मोठी उत्सुकता पाहायला मिळत आहे.
हजरत पिर गैबंशाह वली (रहे.) यांच्या दर्ग्याबाबत भाविकांची अढळ श्रद्धा असून, येथे मनोभावे केलेली प्रार्थना निश्चित फळास येते, अशी लोकांची भावना आहे. याच श्रद्धेच्या ओढीने दरवर्षीप्रमाणे यंदाही परिसरासह दूरदूरच्या भागातून भाविक मोठ्या संख्येने दर्शनासाठी व उर्स सोहळ्यात सहभागी होण्यासाठी दाखल होत आहेत. या उर्समुळे कोरपावलीत अध्यात्मिक चैतन्य पसरले असून, सामाजिक सलोख्याचे सुंदर दर्शन घडत आहे.
उर्स निमित्त सोमवार, दि. २९ डिसेंबर रोजी संदल कार्यक्रम पार पडणार असून, मंगळवार, दि. ३० डिसेंबर रोजी भव्य कव्वाली महोत्सवाचे आयोजन करण्यात आले आहे. या कव्वाली महोत्सवात देशभरात प्रसिद्ध असलेले उत्तर प्रदेशचे नामवंत कव्वाल इंतजार साबरी आणि नागपूरच्या टीव्ही सिंगर कव्वाली साहिबा करिष्मा ताज यांचा रंगतदार कव्वाली मुकाबला होणार आहे. भक्ती, प्रेम आणि अध्यात्माने नटलेली त्यांची सादरीकरणे रसिकांसाठी अविस्मरणीय ठरण्याची अपेक्षा व्यक्त केली जात आहे.
संगीताच्या सुरेल तालात अध्यात्मिक अनुभूती देणारा हा कव्वाली महोत्सव केवळ मनोरंजनापुरता मर्यादित नसून, समाजातील एकतेचा संदेश देणारा आहे. त्यामुळे परिसरातील भाविकांनी व सर्व नागरिकांनी मोठ्या संख्येने उपस्थित राहून कार्यक्रमाची शोभा वाढवावी आणि कव्वालीच्या सुरेल सादरीकरणाचा मनसोक्त आनंद घ्यावा, असे आवाहन हिंदू–मुस्लीम तडवी पंच कमिटीच्या वतीने करण्यात आले आहे.
