शेंदुर्णी -लाईव्ह ट्रेंड्स न्यूज प्रतिनिधी । येथे जगतगुरु संत तुकाराम महाराज बीज मोठ्या उत्साहात आणि भक्तिमय वातावरणात साजरी करण्यात आली. कुणबी पाटील बहुउद्देशीय समाज मंडळाच्या वतीने आयोजित या कार्यक्रमात कीर्तन, महाप्रसाद आणि भव्य शोभायात्रेद्वारे संत तुकाराम महाराजांच्या विचारांचे स्मरण करण्यात आले. या सोहळ्यामुळे संपूर्ण परिसर भक्तिरसात न्हाऊन निघाला होता.
शेंदुर्णी येथील जगतगुरु संत तुकाराम महाराज सभागृहात आयोजित कार्यक्रमाची सुरुवात संत तुकाराम महाराज यांच्या प्रतिमेचे विधिवत पूजन करून करण्यात आली. यानंतर वैकुंठगमन कीर्तनाचे आयोजन करण्यात आले. हभप माऊली महाराज यांनी आपल्या मधुर वाणीतील कीर्तनातून संत तुकाराम महाराजांचे जीवनकार्य आणि अभंगांचा संदेश उपस्थितांना भावपूर्ण शैलीत सांगितला. त्यांच्या कीर्तनाला उपस्थित भाविकांनी उत्स्फूर्त प्रतिसाद दिला.
या कीर्तन सोहळ्यात हभप रामेश्वर महाराज, जिभाऊ महाराज, कडोबा माळी, वामन सकट महाराज आणि युवराज महाराज यांनी टाळकरींसह साथ संगत केली. या सामूहिक सादरीकरणामुळे संपूर्ण सभागृहात भक्तिमय वातावरण निर्माण झाले. कार्यक्रमानंतर उपस्थित भाविकांना महाप्रसादाचे वाटप करण्यात आले.
संध्याकाळच्या सत्रात वाडी दर्जा भागातून संत तुकाराम महाराज, छत्रपती शिवाजी महाराज आणि राजमाता जिजाऊ यांच्या सजीव देखाव्यांसह भव्य शोभायात्रा काढण्यात आली. ढोल-ताशांच्या गजरात आणि भक्तिगीतांच्या सुरावटीत ही शोभायात्रा पार पडली. या शोभायात्रेत समाज बांधव, महिला भगिनी आणि युवकांनी मोठ्या उत्साहात सहभाग नोंदवला.
या कार्यक्रमाच्या आयोजनासाठी कुणबी पाटील बहुउद्देशीय समाज मंडळाच्या पदाधिकाऱ्यांनी विशेष परिश्रम घेतले. संत तुकाराम महाराजांच्या विचारांचा प्रसार आणि समाजात भक्ती, सदाचार व समतेचा संदेश पोहोचवण्याचा उद्देश या कार्यक्रमामागे असल्याचे आयोजकांनी सांगितले.
