जळगाव-लाईव्ह ट्रेंडस न्यूज प्रतिनिधी । पंतप्रधान नरेंद्र मोदी यांच्या वाढदिवसानिमित्त माजी खासदार डॉ. उल्हास पाटील आणि डॉ. केतकी पाटील यांच्या संकल्पनेतून गोदावरी फाउंडेशनने एक स्तुत्य उपक्रम हाती घेतला आहे. ‘स्वस्थ माता, सशक्त परिवार’ या अभियानांतर्गत १७ सप्टेंबरपासून विविध ठिकाणी मोफत आरोग्य तपासणी शिबिरांचे आयोजन करण्यात आले आहे. या शिबिरात नागरिकांच्या सर्व प्रकारच्या तपासण्या मोफत केल्या जाणार आहेत.
गावोगावी आरोग्य शिबिरांचे आयोजन
हे अभियान केवळ जळगाव शहरापुरते मर्यादित नसून, जिल्ह्याच्या विविध भागांत आरोग्यसेवा पोहोचवण्याचे उद्दिष्ट आहे. १७ सप्टेंबर रोजी जळगाव तालुक्यातील कडगाव, भुसावळ आणि नशिराबाद येथे शिबिराची सुरुवात झाली आहे. यासोबतच रक्तदान शिबिराचेही आयोजन करण्यात आले आहे. या अभियानांतर्गत १८ सप्टेंबर रोजी कढोली, १९ सप्टेंबर रोजी गारखेडा (जामनेर), २० सप्टेंबर रोजी देऊळगाव (बुलडाणा) आणि भुसावळ येथे शिबिरे घेतली जाणार आहेत.
मोफत तपासणी आणि तज्ज्ञ डॉक्टरांचे मार्गदर्शन
या अभियानाचे वेळापत्रक ऑक्टोबर महिन्यापर्यंत निश्चित करण्यात आले आहे. २२ सप्टेंबर रोजी जळगाव खुर्द, २३ सप्टेंबर रोजी पिंपळगाव देवी, २४ सप्टेंबर रोजी भुसावळ आणि खडका येथे आरोग्य शिबिरे होणार आहेत. २६ सप्टेंबर रोजी जळगाव खुर्द, २७ रोजी पिंप्री, सोयगाव आणि भुसावळ, तर २८, २९, ३० सप्टेंबर तसेच १ व २ ऑक्टोबर रोजी देखील भुसावळ येथे शिबिरे घेतली जाणार आहेत. या शिबिरांमध्ये तज्ज्ञ डॉक्टर नागरिकांची तपासणी करून गरजू रुग्णांना योग्य मार्गदर्शन करणार आहेत.
सर्वांनी सहभागी होण्याचे आवाहन
गोदावरी फाउंडेशनच्या या उपक्रमामुळे ग्रामीण भागातील नागरिकांना त्यांच्या गावातच आरोग्य तपासणीची सोय उपलब्ध झाली आहे. ‘स्वस्थ माता, सशक्त परिवार’ या अभियानात सहभागी होऊन याचा लाभ घ्यावा असे आवाहन डॉ. उल्हास पाटील वैद्यकीय महाविद्यालय व रुग्णालयातर्फे करण्यात आले आहे.
