जळगाव-लाईव्ह ट्रेंड्स न्यूज प्रतिनिधी । गोदावरी अभियांत्रिकी महाविद्यालय, जळगाव येथील अंतिम वर्षाच्या यांत्रिक अभियांत्रिकी विभागातील चार विद्यार्थ्यांनी एक अत्याधुनिक आणि पूर्णपणे स्वयंचलित सोलर पॅनल क्लिनर रोबो तयार करून नावीन्यपूर्णतेचा नवा अध्याय लिहिला आहे. “ऑर्डिनो संचालित स्वयंचलित सोलर पॅनल क्लिनर रोबो” या नावाने ओळखल्या जाणाऱ्या या प्रकल्पाने सौरऊर्जा क्षेत्रातील एक गंभीर आणि सततच्या समस्येवर तांत्रिक उत्तर शोधले आहे.
या प्रकल्पाच्या मागील संकल्पना आणि अंमलबजावणी ही प्रा. मयूर पी. ठाकूर आणि प्रा. किशोर एम. महाजन यांच्या मार्गदर्शनाखाली पार पडली. विद्यार्थ्यांमध्ये तुषार पाटील, वैभव पाटील, यद्नेश ठाकरे आणि निरज नारखेडे यांचा समावेश असून त्यांनी या यंत्रणेच्या निर्मितीमध्ये तांत्रिक कौशल्य आणि नवोन्मेषी दृष्टिकोन दाखवला आहे. सौर पॅनलवर धूळ, मळ आणि इतर कचरा साचल्यामुळे निर्माण होणाऱ्या कार्यक्षमतेतील घट हा सौरऊर्जेच्या व्यावसायिक वापरात मोठा अडथळा ठरतो. ही अडचण ओळखून, विद्यार्थ्यांनी तयार केलेला रोबो सौर पॅनल स्वच्छ करून कार्यक्षमता वाढविण्यात प्रभावी ठरत आहे.
या रोबोमध्ये वापरण्यात आलेली ऑर्डिनो प्रोग्रामिंग तंत्रज्ञानावर आधारित यंत्रणा पूर्णपणे स्वयंचलित असून, याला कोणत्याही मानवी हस्तक्षेपाची गरज नाही. सेंसर व मोटर आधारित कार्यप्रणालीच्या मदतीने हा रोबो सौर पॅनलचे स्वतःहून निरीक्षण करतो आणि त्यावर साचलेली धूळ स्वच्छ करतो. त्यामुळे जास्तीत जास्त सूर्यप्रकाश पॅनेलवर पडतो आणि ऊर्जा निर्मिती वाढते. ही यंत्रणा मोठ्या क्षमतेच्या औद्योगिक आणि रिमोट लोकेशनवरील सोलर प्रकल्पांसाठी उपयुक्त ठरते.
या विद्यार्थ्यांच्या यशामुळे ना केवळ संस्थेचे नाव उजळले आहे, तर स्वच्छ ऊर्जा निर्मितीसाठी एक स्मार्ट, स्वदेशी आणि परवडणारे तंत्रज्ञान उपलब्ध झाले आहे. भविष्यात या रोबोच्या व्यावसायिक वापरासाठी अधिक सुधारणा करून तो मोठ्या प्रमाणात वापरण्यात येईल, अशी अपेक्षा व्यक्त होत आहे.
