जळगाव-लाईव्ह ट्रेंडस न्यूज प्रतिनिधी । जळगाव महानगरपालिका निवडणुकीच्या रणधुमाळीत आता महाविकास आघाडीतील समीकरणे बदलल्यानंतर शिवसेना (उद्धव बाळासाहेब ठाकरे) पक्षाने स्वबळावर मैदानात उतरण्याचा निर्णय घेतला. या पार्श्वभूमीवर, बुधवारी १७ डिसेंबर सकाळी ११ वाजेपासून शहरातील गोलाणी मार्केटमधील पक्ष कार्यालयात इच्छुक उमेदवारांच्या मुलाखतींना सुरुवात करण्यात आली. ‘मविआ’त जागावाटपाचा तोडगा न निघाल्याने पक्षाने आता स्वबळावर ताकद अजमावण्याचे निश्चित केले आहे.
मुलाखतींद्वारे उमेदवारांची चाचपणी:
जळगाव महानगरपालिकेच्या ७५ जागांसाठी शिवसेना (उबाठा) कडून अनेक इच्छुकांनी दावेदारी केली आहे. या मुलाखतींच्या माध्यमातून पक्षाचे जिल्हाप्रमुख कुलभूषण पाटील आणि महानगराध्यक्ष शरद तायडे यांनी इच्छुकांशी संवाद साधला. मुलाखती दरम्यान उमेदवाराचे प्रभागातील जनसंपर्क, पक्षाशी असलेली एकनिष्ठा आणि त्यांनी केलेले सामाजिक कार्य यावर मुख्य भर देण्यात येत आहे.
महाविकास आघाडीत फूट:
काही दिवसांपासून महाविकास आघाडीमध्ये जागावाटपावरून चर्चा सुरू होती. मात्र, राष्ट्रवादी काँग्रेस (शरद पवार गट) आणि शिवसेना (उबाठा) यांच्यात जागांवरून एकमत होऊ शकले नाही. अखेर दोन्ही पक्षांनी स्वतंत्रपणे निवडणूक लढविण्याची भूमिका घेतल्याने जळगावात आता तिरंगी किंवा चौरंगी लढत होण्याची चिन्हे आहेत.
सकाळपासूनच गोलाणी मार्केटमधील शिवसेना कार्यालयात इच्छुकांनी आणि समर्थकांनी मोठी गर्दी केली होती. प्रत्येक प्रभागातून दोन ते तीन प्रबळ दावेदार मुलाखतीसाठी येत असल्याने पक्षाला उमेदवार निवडताना मोठी कसरत करावी लागणार आहे. या मुलाखतींनंतर लवकरच उमेदवारांची पहिली यादी जाहीर होण्याची शक्यता वर्तवण्यात येत आहे.
