जळगाव-लाईव्ह ट्रेंडस न्यूज प्रतिनिधी । जळगाव शहरातील शनीपेठ परिसरातील शनी मंदिराजवळ गुरुवारी १२ फेब्रुवारी रोजी सायंकाळी साडेसात वाजेच्या सुमारास गॅस सिलेंडरचा भीषण स्फोट झाल्याची घटना घडली. या अपघातात घराचे मोठ्या प्रमाणावर नुकसान झाले आहे. सुदैवाने, या घटनेत कोणतीही जीवितहानी झाली नाही, ही सर्वात मोठी समाधानाची बाब ठरली आहे.
याबाबत अधिक माहिती अशी की, शनीपेठ भागात नरेश देवरे यांचे निवासस्थान आहे. त्यांच्या घरामध्ये सुशांत घोष हे भाडेकरू म्हणून वास्तव्यास आहेत. गुरुवारी १२ फेब्रुवारी रोजी सायंकाळी साडेसात वाजेच्या सुमारास सुशांत घोष यांच्या घरात अचानक घरगुती गॅस सिलेंडरचा स्फोट झाला. हा स्फोट इतका भयानक होता की त्याचा आवाज दूरपर्यंत ऐकू गेला.
या घटनेमुळे घराचे प्रचंड नुकसान झाले आहे. स्फोटामुळे घराच्या भिंतींना मोठे तडे गेले असून खिडक्यांच्या काचा फुटून सर्वत्र विखुरल्या गेल्या. घरातील सर्व संसारोपयोगी वस्तू, कपडे आणि इतर साहित्याचे मोठे नुकसान झाले आहे. सुदैवाने, स्फोट झाला तेव्हा घरातील व्यक्ती सुरक्षित अंतरावर असल्याने कोणालाही दुखापत झाली नाही.
तत्परता घटनेची माहिती मिळताच जळगाव महानगरपालिकेच्या अग्निशमन विभागाचा बंब तातडीने घटनास्थळी दाखल झाला. अग्निशमन दलाच्या जवानांनी परिस्थितीवर नियंत्रण मिळवले आणि आग अधिक पसरण्यापासून रोखली. स्थानिक नागरिकांनीही तातडीने मदतीसाठी धाव घेतली होती. सिलेंडर नेमका कशामुळे फाटला, याचे तांत्रिक कारण अद्याप स्पष्ट झालेले नाही. मात्र, या घटनेने परिसरात काही काळ भीतीचे वातावरण निर्माण झाले होते. या घटनेचा पुढील तपास स्थानिक प्रशासन आणि पोलीस करत आहेत.
