मुंबई-लाईव्ह ट्रेंडस न्यूज वृत्तसेवा | महाराष्ट्रातील कंपन्या गुजरात व इतर राज्यांमध्ये जात असल्याच्या कारणावरून विरोधक नेहमी सत्ताधाऱ्यांना घेरण्याचा केविलवाणा प्रयत्न करतात. पुण्यातील हिंजवडी येथील काही आयटी कंपन्या या पायाभूत सुविधा अभावी स्थलांतर करत आहेत. त्यावरून विरोधकांनी सरकारवर तोफ डागली आहे. पण आता उपमुख्यमंत्री देवेंद्र फडणवीस यांनी थेट परदेशी गुंतवणुकीचा आकडा ट्वीट करून विरोधकांचा खरपूस समाचार घेतला आहे.
केंद्रीय औद्योगिक आणि अंतर्गत व्यापार प्रोत्साहन विभागाने (डीआयपीपीटी) गुरुवारी थेट परकीय गुंतवणुकीबाबतचा अहवाल प्रसिद्ध केला आहे. या अहवालानुसार एफडीआय आकर्षित करण्यात महाराष्ट्र २०२२-२३ मध्ये क्रमांक १ वर राहिल्यानंतर आता २०२३-२४ या आर्थिक वर्षांत सुद्धा पहिल्या क्रमांकावर आला आहे. २०२२-२३ या आर्थिक वर्षात महाराष्ट्रात १ लाख १८ हजार ४२२ कोटी रुपयांची परदेशी गुंतवणूक आली आहे. तर २०२३-२४ या आर्थिक वर्षात थेट परकीय गुंतवणुकीत सुमारे सात हजार कोटी रुपयांनी वाढली आहे. या आर्थिक वर्षात १ लाख २५ हजार १०१ कोटी रुपयांची गुंतवणूक आली आहे.
या आर्थिक वर्षात गुंतवणूक ही गुजरातमध्ये प्राप्त झालेल्या एकूण गुंतवणुकीपेक्षा दुपटीहून अधिक आहे. तर दुसर्‍या क्रमांकावरील गुजरात आणि तिसर्‍या क्रमांकावरील कर्नाटकच्या एकूण बेरजेपेक्षा अधिक आहे. गेल्या आर्थिक वर्षात गुजरातमध्ये ६० हजार ६०० कोटींची परदेशी गुंतवणूक आली आहे. तिसऱ्या क्रमांकावरील कर्नाटकमध्ये ५४ हजार ४२७ कोटी रुपयांची गुंतवणूक आली आहे. महाविकास आघाडीच्या काळात गुंतवणूक आकर्षित करण्यात पिछाडलेला महाराष्ट्र पुन्हा एकदा सलग दोन वर्ष पहिल्या क्रमांकावर आला आहे. बोलायला नाही, कर्तृत्त्व दाखवायला हिंमत लागते, असा टोलाही देवेंद्र फडणवीस यांनी लगावला आहे. महाराष्ट्रातील जनतेचे मी मनापासून अभिनंदन करतो, असे फडणवीस यांनी ट्वीटमध्ये म्हटले आहे.
