नागपूर – लाईव्ह ट्रेंड्स न्यूज वृत्तसेवा । नागपूरमध्ये आमदार बच्चू कडू यांच्या नेतृत्वाखाली हजारो शेतकऱ्यांनी विविध मागण्यांसाठी सुरू केलेले चक्का जाम आंदोलन शनिवारी तीव्र झाले असून, आंदोलनाला हिंसक वळण लागल्याचे चित्र दिसत आहे. या पार्श्वभूमीवर सरकारकडून गृहराज्यमंत्री पंकज भोयर आणि अर्थराज्यमंत्री आशिष जयस्वाल हे आंदोलन स्थळी पोहोचून बच्चू कडूंशी चर्चा करणार आहेत.
गेल्या वीस तासांपासून सुरू असलेल्या या आंदोलनामुळे नागपूरच्या महामार्गांवर वाहतूक ठप्प झाली आहे. शेतकऱ्यांची संपूर्ण कर्जमाफी, कांद्याला योग्य भाव, उसाची एफआरपी, दुधाचे दर, सातबारा कोरा करणे, तसेच शेतमजूर, मच्छिमार, मेंढपाळ आणि दिव्यांगांसाठी सवलतीच्या योजना यांसह एकूण २२ मागण्यांवर हे आंदोलन केंद्रित आहे. बच्चू कडू यांनी सरकारला उद्देशून म्हटले आहे, “भलेही तुम्ही कर्जमाफी नंतर करा, पण त्याचा जीआर तरी आज काढा,” अशी त्यांची ठाम मागणी आहे.
दरम्यान, नागपूर जिल्ह्यातील शेतकरी आक्रमक झाले असून, त्यांनी समृद्धी महामार्गावर टायर पेटवून आंदोलन अधिक तीव्र केले आहे. मागील दोन तासांपासून नागपूर-मुंबई समृद्धी महामार्गावर वाहतूक पूर्णपणे ठप्प झाली आहे. सरकारचे दोन मंत्री आज आंदोलनस्थळी येऊन तोडगा काढण्याचा प्रयत्न करणार आहेत. मात्र या चर्चेतून काही निष्पन्न होते का, याकडे संपूर्ण राज्याचे लक्ष लागले आहे.
महाराष्ट्रातील शेतकऱ्यांच्या संपूर्ण कर्जमुक्तीच्या मागणीसाठी बच्चू कडू यांच्या नेतृत्वाखाली नागपूरमध्ये सुरू असलेले हे बेमुदत आंदोलन दुसऱ्या दिवशीही सुरूच राहिले. परंतु अद्याप सरकारकडून कोणतीही ठोस प्रतिक्रिया आलेली नाही. शेतकरी संतापले असून, त्यांच्या रोषाचे रूपांतर व्यापक चळवळीत होऊ लागले आहे.
स्वराज्य पक्षाचे प्रदेशाध्यक्ष प्रशांत डिक्कर यांनी या पार्श्वभूमीवर सरकारला इशारा देत म्हटले की, “सरकारने शेतकऱ्यांच्या मागण्यांकडे दुर्लक्ष केले, तर राज्यभरात भीषण आंदोलन उसळेल. हा शेतकऱ्यांच्या हक्कांसाठीचा निर्णायक लढा आहे.”
या आंदोलनामुळे समृद्धी महामार्गावरील वाहतूक विस्कळीत झाली असून, नागपूर पोलिस प्रशासन सतर्कतेने तैनात आहे. आंदोलनकर्त्यांचा निर्धार मात्र ठाम आहे — “मागण्या मान्य झाल्याशिवाय आंदोलन मागे घेणार नाही.”
दरम्यान, आज दुपारी चार वाजता गृहराज्यमंत्री पंकज भोयर आणि अर्थराज्यमंत्री आशिष जयस्वाल हे आंदोलनस्थळी जाऊन बच्चू कडूंशी चर्चा करणार आहेत. या चर्चेतून सकारात्मक निर्णय निघेल का, याकडे सर्वांचे लक्ष लागले आहे. जर चर्चेला यश मिळाले नाही, तर राज्यभरातील शेतकरी संघटनांकडून मोठा आंदोलनात्मक उद्रेक होण्याची शक्यता वर्तवली जात आहे.
