गोदावरी अभियांत्रिकी महाविद्यालयात अभियंता दिन उत्साहात

जळगाव-लाईव्ह ट्रेंडस न्यूज प्रतिनिधी । भारतरत्न सर मोक्षगुंडम विश्वेश्वरय्या यांच्या जयंतीनिमित्त गोदावरी अभियांत्रिकी महाविद्यालयात अभियंता दिन मोठ्या उत्साहात साजरा करण्यात आला. या निमित्ताने महाविद्यालयातील प्रत्येक विभागाने विद्यार्थ्यांसाठी विविध स्पर्धा आणि उपक्रमांचे आयोजन केले होते. यातून विद्यार्थ्यांच्या तांत्रिक ज्ञानाला आणि सर्जनशीलतेला वाव देण्यात आला.

विविध विभागांचे नाविन्यपूर्ण उपक्रम
यांत्रिकी विभागाने भाषण स्पर्धा आणि वादविवाद स्पर्धा आयोजित केली, तर इलेक्ट्रॉनिक्स व दूरसंचार विभागातर्फे वक्तृत्व स्पर्धा, गटचर्चा आणि एक नाट्यप्रयोग सादर करण्यात आला. कॉम्प्युटर विभागाने कोडिंग क्लब आणि भाषण स्पर्धा घेऊन विद्यार्थ्यांच्या तांत्रिक कौशल्याला प्रोत्साहन दिले. विशेष म्हणजे, एआय अँड डीएस विभागाने (AI & DS) कृत्रिम बुद्धिमत्तेचा वापर करून नाविन्यपूर्ण स्लाइड्स तयार करण्याची अनोखी स्पर्धा घेतली, ज्याला विद्यार्थ्यांचा उत्स्फूर्त प्रतिसाद मिळाला. विद्युत विभागाने रॅपिड फायर क्विझ स्पर्धा घेतली.

प्राचार्यांनी केले मार्गदर्शन, विजेत्यांना सन्मान
या सर्व उपक्रमांचे उद्घाटन महाविद्यालयाचे प्राचार्य डॉ. विजयकुमार पाटील यांच्या हस्ते झाले. त्यांनी विद्यार्थ्यांना मार्गदर्शन करताना नवीन कल्पना स्वीकारण्याचे, तांत्रिक दृष्टीकोन विकसित करण्याचे आणि आत्मविश्वासाने पुढे जाण्याचे आवाहन केले. या कार्यक्रमांमध्ये यशस्वी ठरलेल्या विद्यार्थ्यांना आकर्षक ट्रॉफी देऊन सन्मानित करण्यात आले. या कार्यक्रमांना प्रा. तुषार कोळी, डॉ. नितीन भोळे, डॉ. हेमंत इंगळे, प्रा. निलेश वाणी, प्रा. महेश एच. पाटील आणि डॉ. अनिलकुमार विश्वकर्मा यांच्यासह सर्व विभागप्रमुख उपस्थित होते.

विद्यार्थ्यांचा सहभाग आणि सन्मान
या विविध स्पर्धांमध्ये अनेक विद्यार्थ्यांनी आपला सहभाग नोंदवला. यांत्रिकी विभागात आशिष खाचणे (भाषण) आणि मयूर कोळी व त्यांच्या गटाने (वादविवाद) बाजी मारली. ई अँड टीसी विभागात ऋतुजा ठेंग आणि प्राजक्ता व नंदिनी पाटील यांनी यश मिळवले. एआयडीएस विभागात यश चौधरी आणि देवयानी पाटील यांनी नाविन्यपूर्ण स्लाइड्ससाठी विजेतेपद पटकावले. विद्युत विभागात भावेश पाचपांडे आणि गणेश कदम यांच्या गटांनी रॅपिड क्विझमध्ये विजय मिळवला, तर संगणक विभागात जानवी बोरसे आणि यतीश भारंबे यांनी भाषण स्पर्धेत यश मिळवले. गोदावरी फाउंडेशनच्या पदाधिकाऱ्यांनी विद्यार्थ्यांच्या या उपक्रमांचे कौतुक केले.