बेंगळुरू-वृत्तसेवा । अंमलबजावणी संचालनालयाने (ईडी) गुरुवारी दोन वेगवेगळ्या प्रकरणांमध्ये मोठी कारवाई करत देशातील ऑनलाइन गेमिंग आणि रिअल इस्टेट क्षेत्राला मोठा हादरा दिला आहे. अंमलबजावणी संचालनालयाच्या बेंगळुरू क्षेत्रीय कार्यालयाने प्रसिद्ध ऑनलाइन गेमिंग कंपनी WinZO Private Limited आणि तिची उपकंपनी Zo Private Limited यांच्यावर परकीय चलन व्यवस्थापन कायद्याच्या (FEMA) उल्लंघनाप्रकरणी मोठी कारवाई केली असून, कंपनीची सुमारे ५९० कोटी रुपयांची मालमत्ता जप्त केली आहे.
या कारवाईमध्ये प्रामुख्याने कंपनीचे बँक खात्यांमधील शिल्लक, मुदत ठेवी, म्युच्युअल फंड आणि बाँड्स यांचा समावेश आहे. ईडीच्या तपासानुसार, कंपनीने परदेशातील गुंतवणुकीच्या नावाखाली मोठा निधी वळवला होता, ज्याचा वापर ब्राझील, जर्मनी आणि अमेरिकेसारख्या देशांमध्ये लूडो, स्नेक्स अँड लॅडर्स आणि ब्लॅकजॅकसारखे ‘रिअल मनी गेम’ चालवण्यासाठी केला जात होता.
तपासादरम्यान असे समोर आले की, WinZO ने स्थापन केलेल्या परदेशी उपकंपन्या केवळ कागदोपत्री अस्तित्वात होत्या आणि त्यांचे कोणतेही स्वतंत्र कार्यालय किंवा कर्मचारी परदेशात नव्हते. या सर्व कंपन्यांचे नियंत्रण आणि आर्थिक व्यवहार थेट भारतातूनच चालवले जात होते. याव्यतिरिक्त, कंपनीवर ग्राहकांना मानवी खेळाडूंऐवजी ‘AI बॉट्स’ विरुद्ध खेळायला लावून फसवणूक केल्याचा आणि ग्राहकांच्या वॉलेटमधील पैसे काढण्यावर निर्बंध घातल्याचा गंभीर आरोपही ठेवण्यात आला आहे.
दुसरीकडे, ईडीच्या गुरुग्राम कार्यालयाने एका मोठ्या रिअल इस्टेट घोटाळ्यात ‘Ansal Hub-83’ या व्यावसायिक प्रकल्पाशी संबंधित सुमारे ८२ कोटी रुपयांची स्थावर मालमत्ता तात्पुरती जप्त केली आहे. हा तपास हरियाणा पोलिसांनी अन्सल हाऊसिंग लिमिटेडच्या प्रवर्तक आणि वरिष्ठ अधिकाऱ्यांविरुद्ध दाखल केलेल्या फसवणूक आणि गुन्हेगारी कटाच्या तक्रारीवर आधारित आहे. या प्रकल्पात १००० पेक्षा जास्त गुंतवणूकदारांनी कोट्यवधी रुपये गुंतवले होते, परंतु विकासकाने योग्य वैधानिक मंजुरी नसतानाही युनिट्सची विक्री केली आणि जमा झालेला निधी प्रकल्पासाठी न वापरता वैयक्तिक कामासाठी वळवला. ईडीने जप्त केलेल्या या मालमत्तांमध्ये १४७ व्यावसायिक दुकाने, १३७ कार्यालये आणि दोन रेस्टॉरंट्सचा समावेश असून पुढील तपास सुरू आहे.
