जामनेर-लाईव्ह ट्रेंड्स न्यूज प्रतिनिधी । जामनेर नगरपालिकेत भारतीय जनता पार्टीने एकहाती सत्ता स्थापन करत नगरराजकारणात आपले वर्चस्व अधिक दृढ केले आहे. नगराध्यक्षपदी सौ. साधना महाजन यांची बिनविरोध निवड झाल्यानंतर आज झालेल्या विशेष सभेत उपनगराध्यक्षपदी डॉ. प्रशांत भोंडे यांची निवड करण्यात आली. या निवडीमुळे नगरपालिकेतील सत्ताकेंद्र पूर्णतः भाजपकडे केंद्रीत झाल्याचे स्पष्ट झाले आहे.
आज पार पडलेल्या विशेष सभेत नगरपालिकेच्या उपनगराध्यक्ष पदासाठी डॉ. प्रशांत भोंडे यांचे नाव सर्वानुमते पुढे आले. कोणताही विरोध नसल्याने त्यांची निवड शांततेत पार पडली. त्याचबरोबर नगरपालिकेत तीन स्वीकृत नगरसेवकांची निवड करण्यात आली असून यामध्ये प्रल्हाद सोनवणे, दीपक डांगी आणि विश्वास पर्वते यांचा समावेश आहे. या नियुक्त्यांमुळे भाजपचा नगरपालिकेतील आकडेमोडीचा ताळमेळ अधिक मजबूत झाला आहे.
निवडीनंतर नगराध्यक्ष सौ. साधना महाजन यांच्या हस्ते नवनिर्वाचित उपनगराध्यक्ष डॉ. प्रशांत भोंडे तसेच स्वीकृत नगरसेवकांचा सत्कार करण्यात आला. या प्रसंगी नगरपालिकेतील सर्व नगरसेवक, भारतीय जनता पार्टीचे पदाधिकारी व कार्यकर्ते मोठ्या संख्येने उपस्थित होते. सत्कार सोहळ्याच्या माध्यमातून नव्या नेतृत्वाला शुभेच्छा देण्यात आल्या.
यावेळी बोलताना नगराध्यक्ष साधना महाजन यांनी सांगितले की, नगरपालिकेच्या माध्यमातून शहराच्या विकासासाठी सर्वांना एकत्रितपणे काम करावे लागेल. उपनगराध्यक्ष आणि स्वीकृत नगरसेवकांच्या अनुभवाचा फायदा शहराच्या सर्वांगीण प्रगतीसाठी करून घेतला जाईल, असा विश्वास त्यांनी व्यक्त केला.
