चोपडा लाईव्ह ट्रेंडस न्यूज प्रतिनिधी । चोपडा तालुक्यातील अडावद येथील शामराव येसो महाजन विद्यालयात राष्ट्रीय स्वास्थ्य कार्यक्रमांतर्गत प्राथमिक आरोग्य केंद्र अडावदच्या वैद्यकीय अधिकारी डॉ. अर्चना पाटील यांनी विद्यार्थ्यांना आरोग्यदायी जीवनाचा मंत्र दिला. विद्यार्थ्यांना दैनंदिन आरोग्य सुदृढ राखण्यासाठी हात धुण्यापासून, समतोल आहार, स्वच्छ पाणी, व्यसनमुक्ती अशा अनेक बाबी सोप्या पद्धतीने समजावून सांगितल्या.
२८ फेब्रुवारी रोजी दुपारी १ वाजता श्री संत सावता माळी शैक्षणिक व सामाजिक संस्था संचालित शामराव येसो महाजन विद्यालयात प्राथमिक आरोग्य केंद्र अडावद येथे राष्ट्रीय किशोर स्वास्थ्य कार्यक्रमांतर्गत हा कार्यक्रम आयोजित करण्यात आला होता.
डॉ. अर्चना पाटील यांनी विद्यार्थ्यांना आरोग्याचे महत्त्व विशद करताना, जंक फूड टाळून घरातील पौष्टिक पदार्थांचे सेवन करण्याचा सल्ला दिला. शेंगदाणे, फुटाणे, मोड आलेली कडधान्ये, भाजीपाला, अंडी यांसारख्या पदार्थांचा आहारात समावेश करून समतोल आहार घेण्याचा आग्रह त्यांनी धरला. आरोग्य सहाय्यक वाय. आर. पाटील यांनी विद्यार्थ्यांना हात धुण्याची योग्य पद्धत प्रात्यक्षिकासह समजावून सांगितली. प्रयोगशाळा तंत्रज्ञ सचिन महाजन यांनी विद्यार्थ्यांना व्यसनांच्या दुष्परिणामांची माहिती देऊन व्यसनमुक्तीचे महत्त्व पटवून दिले.
यावेळी आरोग्य सहाय्यक वाय. आर. पाटील, आरोग्य सहाय्यक राहुल मेहकर, प्रयोगशाळा तंत्रज्ञ सचिन महाजन, मुख्याध्यापक आर. के. पिंपरे मंचावर उपस्थित होते. कार्यक्रमाच्या यशस्वीतेसाठी उपशिक्षक एन. ए. महाजन, व्ही. एम. महाजन, एस. जी. महाजन, एम. एन. माळी, पी.आर. माळी, एस. बी. चव्हाण, एस. के. महाजन, पी.एस. पवार आणि शिक्षकेतर कर्मचारी सी.एस.महाजन, ईश्वर मिस्तरी, रवींद्र महाजन, अशोक महाजन यांनी विशेष परिश्रम घेतले.
