जळगाव-लाईव्ह ट्रेंड्स न्यूज प्रतिनिधी । समाजाच्या तळागाळात निस्वार्थ भावनेने कार्य करणाऱ्या सेवाव्रतींचा सन्मान करण्यासाठी दिला जाणारा प्रतिष्ठेचा “डॉ. आचार्य अविनाशी सेवा पुरस्कार” यंदा जाहीर झाला असून वैयक्तिक पुरस्कारासाठी कोल्हापूरच्या ज्येष्ठ समाजसेविका अनुराधा भोसले यांची निवड करण्यात आली आहे. संस्थास्तरीय पुरस्कार नाशिक जिल्ह्यातील मोहाडी (ता. दिंडोरी) येथील Sahyadri Farmers Producer Company Limited यांना जाहीर करण्यात आला आहे. या पुरस्कार वितरणाचा भव्य सोहळा १ मार्च रोजी जळगाव येथे पार पडणार आहे.
Keshavsmruti Pratishthan व Jalgaon Janata Sahakari Bank यांच्या संयुक्त विद्यमाने हा पुरस्कार प्रदान केला जातो. रविवार, दि. १ मार्च रोजी सायंकाळी ५ वाजता जळगाव येथील Chhatrapati Sambhaji Raje Natyamandir येथे हा सोहळा होणार आहे. प्रमुख अतिथी म्हणून ज्येष्ठ समाजसेवक Popatrao Pawar आणि राज्याचे जलसंपदा मंत्री Girish Mahajan उपस्थित राहणार असल्याची माहिती डॉ. भरत अमळकर व सतीश मदाने यांनी पत्रकार परिषदेत दिली.
“आपल्या समाजावर आईसारखं निस्वार्थ प्रेम करूया” या विचारधारेतून प्रेरित होऊन थोर समाजसेवक Dr. Avinash Acharya यांनी सेवाकार्याची परंपरा सुरू केली. २०१२-१३ पासून सुरू झालेल्या या पुरस्काराचे यंदा दहावे वर्ष असून आरोग्य, शिक्षण, महिला सक्षमीकरण, मतिमंद व बहुविकलांगांचे पुनर्वसन, भटक्या-विमुक्त समाजाचा विकास तसेच शेतकरी व ऊसतोड कामगारांच्या मुलांचे संगोपन अशा विविध क्षेत्रांत उल्लेखनीय योगदान देणाऱ्या व्यक्ती व संस्थांचा गौरव या माध्यमातून करण्यात येतो. विशेष म्हणजे या पुरस्कारासाठी अर्ज मागवले जात नाहीत; निवड समिती प्रत्यक्ष पाहणी आणि सखोल अभ्यास करून गुणवत्तेच्या आधारेच निवड करते.
यंदाच्या वैयक्तिक पुरस्काराच्या मानकरी अनुराधा भोसले या १९९४ पासून सामाजिक कार्यात सक्रिय आहेत. Avani Foundation च्या माध्यमातून त्या निराधार, वंचित, बालमजूर आणि स्थलांतरित कामगारांच्या मुलांसाठी सातत्याने कार्यरत आहेत. बालमजुरी, स्त्रीभ्रूणहत्या आणि बाल तस्करीविरोधात त्यांनी ठाम भूमिका घेतली आहे. ऊसतोड व स्थलांतरित कामगारांच्या मुलांना शिक्षणाच्या प्रवाहात आणण्यासाठी त्यांनी आतापर्यंत ११,५०० हून अधिक मुलांना शिक्षणाची संधी उपलब्ध करून दिली आहे. २०११ मध्ये स्थापन केलेल्या “एकटी महिला संघटना”च्या माध्यमातून विधवा, निराधार व परित्यक्त महिलांच्या हक्कांसाठी त्यांनी प्रभावी चळवळ उभी केली आहे.
संस्थास्तरीय पुरस्कारासाठी निवड झालेली सह्याद्री फार्मर्स प्रोड्युसर कंपनी ही सुमारे १७ हजार शेतकऱ्यांच्या सहभागातून उभी राहिलेली अग्रगण्य संस्था आहे. श्री विलास शिंदे यांच्या संकल्पनेतून साकारलेल्या या संस्थेने “सीड टू प्लेट” मॉडेल, ब्लॉकचेनसारखे आधुनिक तंत्रज्ञान आणि पारदर्शक व्यवहार यांचा अवलंब करून शेती क्षेत्रात नवे मानदंड निर्माण केले आहेत. ४२ देशांमध्ये द्राक्षे व विविध फळांची निर्यात करत शेतकऱ्यांना जागतिक बाजारपेठेशी जोडण्याचे महत्त्वपूर्ण कार्य या संस्थेने केले आहे.
पुरस्कार निवड समितीत सौ. हेमलता अमळकर, अनिल भोकरे, पुंडलिक पाटील, विवेक पाटील, राहुल पवार आणि भानुदास येवलेकर यांचा समावेश आहे. दहाव्या वर्षानिमित्त होणारा यंदाचा सोहळा अधिक व्यापक आणि प्रेरणादायी ठरेल, असा विश्वास आयोजकांनी व्यक्त केला आहे. जळगावकर नागरिकांनी मोठ्या संख्येने उपस्थित राहून या सेवागौरव सोहळ्याचा लाभ घ्यावा, असे आवाहन करण्यात आले आहे.
पत्रकार परिषदेत डॉक्टर भरात अमळकर प्रमुख केशवस्मृती सेवा संस्था समूह, सतीश मदाने (अध्यक्ष जळगाव जनता सह. बँक), दिलीप चोपडा (सचिव केशव स्मृती), संजय नागमोती (मुख्य कार्यकारी अधिकारी जनता बँक), सागर येवले (प्रशासकीय अधिकारी केशव स्मृती), भानुदास येवलेकर (प्रकल्प अधिकारी केशव स्मृती), कपिल चौबे (उप महाव्यवस्थापक जनता बँक), दिनेश ठाकरे (प्रशासकीय अधिकारी विवेकानंद प्रतिष्ठान) उपस्थित होते.
