जामनेर-लाईव्ह ट्रेंड्स न्यूज प्रतिनिधी । ग्रामीण भागातील युवा साहित्यिक, कवी आणि कलावंतांना व्यासपीठ मिळावे तसेच लोकसाहित्याची परंपरा नव्या पिढीपर्यंत पोहोचावी या उद्देशाने जामनेर येथे येत्या 29 व 30 डिसेंबर रोजी जिल्हास्तरीय दोन दिवशीय ग्रामीण युवा साहित्य संमेलनाचे आयोजन करण्यात आले आहे. जामनेर येथील एकलव्य माध्यमिक व ज्ञानगंगा हायस्कूलच्या भव्य पटांगणावर हे संमेलन पार पडणार असून जिल्हाभरातील साहित्यप्रेमींमध्ये या कार्यक्रमाबद्दल उत्सुकता निर्माण झाली आहे.
या साहित्य संमेलनात ग्रामीण संस्कृतीचे विविध पैलू उलगडणारे कार्यक्रम आयोजित करण्यात आले आहेत. ओवी गायन, बहिणाबाईंच्या बोलीतील कथाकथन, ग्रामीण जीवनावर आधारित एकांकिका, कवी संमेलन, गीत संध्या, धमाल सांस्कृतिक कार्यक्रम, तसेच परिसंवाद व चर्चासत्रे यांचा समावेश असणार आहे. या माध्यमातून ग्रामीण साहित्य, बोलीभाषा आणि लोककलेचे जतन व संवर्धन करण्याचा प्रयत्न केला जाणार आहे.
या संमेलनाची माहिती देण्यासाठी आयोजित पत्रकार परिषदेत जामनेर तालुका साहित्य सांस्कृतिक मंडळाचे अध्यक्ष अमृत यात्री, डी. डी. पाटील, उपाध्यक्ष एस. आर. महाजन, सचिव गोरख सूर्यवंशी आणि सुखदेव महाजन यांनी उपस्थितांना मार्गदर्शन केले. ग्रामीण भागातील तरुण लेखक, कवी व कलावंतांनी मोठ्या संख्येने सहभागी व्हावे आणि आपल्या सर्जनशीलतेचे दर्शन घडवावे, असे आवाहन त्यांनी यावेळी केले.
जिल्ह्यातील रसिक प्रेक्षकांसाठी हे साहित्य संमेलन पर्वणी ठरणार असून, ग्रामीण संस्कृतीची ओळख करून देणाऱ्या या उपक्रमाचा लाभ सर्व साहित्यप्रेमींनी घ्यावा, असे आयोजकांनी स्पष्ट केले. दोन दिवस चालणाऱ्या या संमेलनामुळे जामनेर तालुका साहित्यिक नकाशावर अधिक ठळकपणे उजळणार असल्याचा विश्वास व्यक्त करण्यात येत आहे.
एकूणच ग्रामीण युवा साहित्यिकांच्या अभिव्यक्तीला चालना देणारे आणि लोकसाहित्याला नवे व्यासपीठ उपलब्ध करून देणारे हे जिल्हास्तरीय साहित्य संमेलन जामनेरसाठी सांस्कृतिक दृष्ट्या महत्त्वाचे ठरणार आहे.
