जळगाव-लाईव्ह ट्रेंड्स न्यूज प्रतिनिधी । संयुक्त राष्ट्र संघटनेने १८ डिसेंबर १९९२ रोजी राष्ट्रीय, वांशिक, धार्मिक आणि भाषिक अल्पसंख्यांकांच्या हक्कांसाठी स्वीकारलेल्या जाहीरनाम्याच्या पार्श्वभूमीवर जळगाव जिल्ह्यात आंतरराष्ट्रीय अल्पसंख्यांक हक्क दिन उत्साहात साजरा करण्यात आला. जिल्हाधिकारी कार्यालयातील नियोजन भवन येथे आयोजित जिल्हास्तरीय कार्यक्रमास विविध समाजघटकांचा उत्स्फूर्त प्रतिसाद लाभला.
जिल्हाधिकारी रोहन घुगे यांच्या अध्यक्षतेखाली झालेल्या या कार्यक्रमात अल्पसंख्यांक समाजाच्या हक्कांचे संरक्षण आणि त्यांच्या सर्वांगीण विकासावर भर देण्यात आला. यावेळी जिल्हाधिकारी घुगे यांनी शासनाकडून अल्पसंख्यांकांसाठी राबविण्यात येणाऱ्या विविध योजना व कार्यक्रमांचा जास्तीत जास्त लाभ घेण्यासाठी नागरिकांनी जागृत राहावे, असे आवाहन केले. शैक्षणिक, आर्थिक व सामाजिक उन्नतीसाठी उपलब्ध असलेल्या संधींचा योग्य वापर झाल्यास समाज प्रगतीच्या दिशेने वेगाने जाऊ शकतो, असेही त्यांनी नमूद केले.
कार्यक्रमात यशदाचे प्रशिक्षक श्री. आर. अहमद यांनी मौलाना आझाद महामंडळाच्या वतीने अल्पसंख्यांक समुदायासाठी राबविण्यात येणाऱ्या विविध शासकीय योजनांचे सादरीकरण करून उपस्थितांना सविस्तर मार्गदर्शन केले. शिक्षण, स्वयंरोजगार, प्रशिक्षण आणि आर्थिक सहाय्याशी संबंधित योजनांची माहिती त्यांनी उदाहरणांसह स्पष्ट केली.
याचवेळी जिल्हा नियोजन समिती, जळगाव यांच्यामार्फत अल्पसंख्यांक विकास विभागाच्या माध्यमातून राबविण्यात येणाऱ्या योजनांची सविस्तर माहिती सहायक जिल्हा नियोजन अधिकारी राहुल इधे यांनी सादरीकरणाद्वारे दिली. त्याचप्रमाणे जिल्हा व्यवस्थापक, मौलाना आझाद महामंडळ, जळगाव यांच्याकडूनही अल्पसंख्यांक समुदायासाठी उपलब्ध असलेल्या विविध शासकीय योजनांची माहिती देण्यात आली.
कार्यक्रमात अल्पसंख्यांक समुदायांच्या घटनात्मक हक्कांबाबत सविस्तर मार्गदर्शन करण्यात आले. या प्रसंगी निवासी उपजिल्हाधिकारी तथा अपर जिल्हादंडाधिकारी वैशाली चव्हाण, शिक्षणाधिकारी कल्पना चव्हाण, जिल्हा व्यवस्थापक पितांबर पाटील, सहायक जिल्हा नियोजन अधिकारी राहुल इधे, भरत साळुंखे यांच्यासह विविध विभागांचे अधिकारी व कर्मचारी, अल्पसंख्यांक समुदायातील नागरिक तसेच शाळेतील विद्यार्थी-विद्यार्थिनी मोठ्या संख्येने उपस्थित होते.
एकूणच, अल्पसंख्यांक हक्क दिनानिमित्त आयोजित या जिल्हास्तरीय कार्यक्रमातून हक्कांची जाणीव, शासकीय योजनांची माहिती आणि समाजाच्या सर्वांगीण विकासाचा संदेश प्रभावीपणे पोहोचला, अशी भावना उपस्थितांनी व्यक्त केली.
