भुसावळ-लाईव्ह ट्रेंड्स न्यूज प्रतिनिधी । दावत-ए-इस्लामी इंडिया यांच्या वतीने भुसावळ येथे आयोजित करण्यात आलेला जिल्हास्तरीय हज प्रशिक्षण कॅम्प उत्साहात आणि यशस्वीरीत्या पार पडला. हज आणि उमरा यात्रेसाठी जाणाऱ्या भाविकांना योग्य मार्गदर्शन मिळावे, या उद्देशाने दरवर्षीप्रमाणे यंदाही हज-ओ-उमरा विभागामार्फत या शिबिराचे आयोजन करण्यात आले होते.
या प्रशिक्षण शिबिरात मुंबईहून उपस्थित हाजी अबु बकर साहेब, दावत-ए-इस्लामी इंडिया चे जिल्हाध्यक्ष जुबैर अत्तारी तसेच मौलाना जुल्फिकार मिस्बाही यांनी हज यात्रेकरूंना हजचे नियम, अरकान, तसेच संपूर्ण यात्रेदरम्यान पाळावयाच्या धार्मिक विधींबाबत सविस्तर मार्गदर्शन केले. त्यांच्या मार्गदर्शनामुळे भाविकांना हज यात्रेची सखोल माहिती मिळाली.
मुस्लिम कॉलनी, खडका रोड येथील ताज हॉलमध्ये सकाळी १० वाजता सुरू झालेला हा कॅम्प सायंकाळी ५ वाजेपर्यंत चालला. कार्यक्रमामध्ये महिलांसाठी स्वतंत्र बसण्याची व्यवस्था करण्यात आली होती. तसेच सर्व उपस्थित पाहुणे आणि भाविकांसाठी भोजनाची योग्य व्यवस्था करण्यात आली होती.
या कॅम्पमध्ये जिल्हाभरातून मोठ्या संख्येने हज यात्रेकरूंनी सहभाग घेतला आणि या उपक्रमाचा लाभ घेतला. कार्यक्रम यशस्वी करण्यासाठी शोएब अत्तारी, हाजी शाकिर कादरी, अझहर कादरी, हाजी जमीर अत्तारी, अब्दुल सईद, हाजी तनवीर अत्तारी, फरीद शेख, जहांगीर शेख, साबिर मनियार तसेच GNRF चे जिल्हाध्यक्ष रफीक रोशन कादरी यांनी विशेष परिश्रम घेतले.
एकूणच, या हज प्रशिक्षण कॅम्पमुळे भाविकांना हज यात्रेसाठी आवश्यक धार्मिक आणि व्यावहारिक मार्गदर्शन मिळून त्यांचा आत्मविश्वास वाढण्यास मदत झाली.
