मुक्ताईनगर-लाईव्ह ट्रेंडस न्यूज प्रतिनिधी । चांगदेव महाराज तापी-पूर्णा संगम येथे आपत्ती व्यवस्थापन विभागाने २१ फेब्रुवारी रोजी आपत्ती व्यवस्थापन प्रशिक्षण उपक्रमांचे आयोजन केले होते. आमदार चंद्रकांत पाटील यांनी SDRF व आपदा मित्र यांच्या कार्यप्रणालीची पाहणी केली. यावेळी उपविभागीय पोलीस अधिकारी, तहसीलदार मुक्ताईनगर, जिल्हा आपत्ती व्यवस्थापन अधिकारी व सरपंच चांगदेव आदी उपस्थित होते.
बोटीतून पडून व्यक्तीचा बचाव
दुपारी 3.25 वाजता तापी-पूर्णा संगमावर प्रवासी बोटीतून संगमदर्शनासाठी आलेल्या एका व्यक्तीचा पाण्यात पडण्याचा प्रकार घडला. राज्य आपत्ती प्रतिसाद दल, धुळे यांनी तातडीने बचाव कार्य करत दुपारी 3.30 वाजता संबंधित व्यक्तीला सुखरूप बाहेर काढले. त्यानंतर आरोग्य अधिकाऱ्यांनी तातडीने प्राथमिक उपचार दिले.
गर्दी नियंत्रणात आणली
दुपारी 3.45 वाजता पोलीस कर्मचारी घटनास्थळी दाखल झाले व गर्दी नियंत्रणात आणली. या घटनेच्या पार्श्वभूमीवर राज्य आपत्ती प्रतिसाद दल टीमच्या बचाव कार्याचा आढावा घेत रंगीत तालीम राबवण्यात आली. दरम्यान, श्री आदिशक्ती मुक्ताई मंदिर (मेहुण) परिसरात दुपारी 3.52 वाजता गवताला आग लागल्याची दुसरी घटना घडली. तहसीलदार मुक्ताईनगर यांनी तातडीने बोदवड नगरपालिकेच्या अग्निशमन विभागाला सूचित केले. दुपारी 4.05 वाजता अग्निशमन दलाने आग आटोक्यात आणली. या घटनेत कोणतीही जीवितहानी झाली नाही.
या संपूर्ण आपत्ती व्यवस्थापन रंगीत तालीम उपक्रमास आमदार चंद्रकांत पाटील, निवासी उपजिल्हाधिकारी भिमराव दराडे, उपविभागीय अधिकारी भुसावळ जितेंद्र पाटील, तहसीलदार व पोलीस निरीक्षक मुक्ताईनगर, जिल्हा आपत्ती व्यवस्थापन अधिकारी, राज्य आपत्ती प्रतिसाद दल टीमचे 3 अधिकारी व 24 जवान तसेच 20 आपदा मित्र उपस्थित होते. जिल्हाधिकारी आयुष प्रसाद यांच्या निर्देशानुसार यावर्षी सदर यात्रेचे पूर्वनियोजन आणि आपत्ती व्यवस्थापनाच्या अनुषंगाने आपत्ती व्यवस्थापन प्राधिकरणाच्या बैठकीचे आयोजन करण्यात आले होते, त्यानुसार ही रंगीत तालीम घेण्यात आली.
