भुसावळ-लाईव्ह ट्रेंड्स न्यूज प्रतिनिधी । भुसावळ नगरपरिषदेत सध्या राजकीय वातावरण तापले असून तापी नदीपात्रातील पिण्याच्या पाण्यासाठी असलेल्या बंधाऱ्याची उंची वाढविण्याचे काम आणि संत गाडगेबाबा रुग्णालयातील नगरपरिषदेच्या दप्तर स्थलांतराचा निर्णय या दोन मुद्द्यांवरून सत्ताधारी आणि विरोधकांमध्ये तीव्र संघर्ष उभा राहिला आहे. शहरातील विकासकामे आणि प्रशासकीय निर्णय प्रक्रियेवरून आरोप-प्रत्यारोपांचे सत्र सुरू झाले आहे.
उन्हाळ्यातील संभाव्य पाणीटंचाई लक्षात घेता तापी नदीपात्रात पिण्याच्या पाण्याच्या साठ्यासाठी असलेल्या बंधाऱ्याची उंची वाढविण्याचे काम हाती घेण्यात आले आहे. या पार्श्वभूमीवर उपनगराध्यक्षा शैलेजा नारखेडे, भाजप गटनेते युवराजभाऊ लोणारी व अन्य नगरसेवकांनी घटनास्थळी भेट देत बांधकामाची पाहणी केली. या कामासंदर्भात महाराष्ट्र नगरपरिषद अधिनियमाच्या कलम ३०८ नुसार योग्य कार्यवाही करण्याची मागणी मुख्याधिकारी राजेंद्र फातले यांच्याकडे करण्यात आली आहे. कामाची पारदर्शकता व कायदेशीर पूर्तता यावर विरोधकांनी भर दिला आहे.
दरम्यान, स्थानिक विकास निधीतून भुसावळ शहरातील विविध विकासकामांसाठी २ कोटी ३० लाख रुपयांची तरतूद करण्यात आली आहे. या निधीअंतर्गत होणाऱ्या कामांसाठी मुख्याधिकाऱ्यांची सही आणि मान्यता आवश्यक असल्याचे भाजप गटनेते युवराज लोणारी यांनी स्पष्ट केले. सर्व प्रभागांमध्ये समांतर व समान विकासकामे व्हावीत, अशी मागणी विरोधकांकडून करण्यात येत आहे. निधीच्या वापराबाबत पारदर्शकता आणि समन्याय राखावा, असा सूरही यावेळी उमटला.
संत गाडगेबाबा रुग्णालयातील नगरपरिषदेचे दप्तर आणि संपूर्ण प्रशासकीय कारभार तातडीने स्थलांतरित करण्याच्या निर्णयावरूनही वादंग निर्माण झाला आहे. कोणताही ठराव किंवा अधिकृत आदेश न काढता एवढा मोठा निर्णय घेतल्याचा आरोप विरोधकांनी केला आहे. भाजप गटनेते युवराज लोणारी यांनी पत्रकार परिषद घेत या निर्णयाचा तीव्र निषेध व्यक्त केला होता. या पार्श्वभूमीवर त्यांच्या नेतृत्वाखाली नगरसेवकांनी उपविभागीय अधिकारी कार्यालयात ठिय्या आंदोलन करत प्रशासनाला जाब विचारला.
यानंतर मुख्याधिकारी राजेंद्र फातले हे दीर्घ रजेवर गेले होते. काल ते पुन्हा रुजू झाल्यानंतर युवराज लोणारी यांनी त्यांना निवेदन सादर केले. संत गाडगेबाबा रुग्णालयाच्या संरचनेत अनधिकृत तोडफोड करून दुरुस्तीच्या नावाखाली सार्वजनिक मालमत्तेचे नुकसान झाल्याचा आरोप करण्यात आला आहे. या प्रकरणी जिल्हाधिकाऱ्यांनी चौकशीचे आदेश दिले असून संबंधितांवर कायदेशीर कारवाईची मागणी करण्यात आली आहे. त्यामुळे रुग्णालयाच्या दुरुस्तीचा मुद्दा पुन्हा ऐरणीवर आला आहे.
या दोन्ही संवेदनशील मुद्द्यांमुळे भुसावळ नगरपरिषदेत सत्ताधारी आणि विरोधकांमधील तणाव अधिक तीव्र झाला आहे. शहरातील पाणीपुरवठा, विकासनिधीचा वापर आणि प्रशासकीय निर्णय प्रक्रियेवरून राजकीय वातावरण ढवळून निघाले असून पुढील काही दिवसांत या वादाला कोणते वळण लागते, याकडे नागरिकांचे लक्ष लागले आहे.
