मुक्ताईनगर – लाईव्ह ट्रेंड्स न्यूज प्रतिनिधी । गणेश विसर्जनाच्या धामधुमीत मुक्ताईनगरमध्ये जनावरे वाहून नेणारा एक कंटेनर पकडण्यात आल्याने शहरात खळबळ उडाली आहे. शिवसेना शहरप्रमुख गणेश टोंगे आणि त्यांच्या सहकाऱ्यांनी मिळालेल्या गुप्त माहितीनंतर सतर्कता दाखवत हा कंटेनर अडवला. तपासणी केली असता कंटेनरमध्ये अमानुष पद्धतीने कोंबून ठेवलेल्या अनेक म्हशी जिवंत अवस्थेत आढळून आल्या.
हा प्रकार गुरुवारी उशिरा रात्री घडला असून, गणेश विसर्जनाच्या निमित्ताने नागरिकांचा मोठा जमाव रस्त्यावर असतानाच या घटनेला वाव मिळाल्याचा संशय व्यक्त होत आहे. कंटेनर अडवून पोलिसांना त्वरित माहिती देण्यात आली, त्यानंतर मुक्ताईनगर पोलिसांनी घटनास्थळी धाव घेत तपास सुरू केला. पोलिसांनी जनावरांची तातडीने सुटका करून त्यांना सुरक्षित स्थळी हलवले आहे.
या घटनेबाबत कंटेनर चालक आणि मालकाविरोधात मुक्ताईनगर पोलिस ठाण्यात गुन्हा दाखल करण्यात आला आहे. प्रकरणाच्या गांभीर्यामुळे नागरिकांमध्ये तीव्र संतापाचे वातावरण असून, अशा प्रकारच्या जनावरांच्या तस्करीविरोधात कठोर कारवाई करण्यात यावी, अशी मागणी होत आहे. जनावरे कोंबून ठेवण्याची पद्धत अत्यंत अमानवी असून, प्राण्यांवर होणाऱ्या क्रूरतेविरोधात जनजागृती आणि कायद्यांची अंमलबजावणी गरजेची असल्याचे मत प्रबुद्ध नागरिकांनी व्यक्त केले आहे.
पोलिस निरीक्षक राजकुमार चव्हाण यांच्या मार्गदर्शनाखाली या प्रकरणाचा अधिक तपास सुरू असून, या मागे कुणाचा हात आहे, याचा शोध घेण्याचे प्रयत्न सुरू आहेत. सध्या पकडलेला कंटेनर पोलिसांच्या ताब्यात असून, या प्रकरणाचा संपूर्ण मागोवा घेतला जात आहे.
