सावदा-लाईव्ह ट्रेंड्स न्यूज प्रतिनिधी । भारतीय राष्ट्रीय काँग्रेसच्या १४० व्या स्थापना दिनानिमित्त खिरोदा येथे भव्य व उत्साही वातावरणात कार्यक्रमाचे आयोजन करण्यात आले. स्वातंत्र्य, लोकशाही आणि संविधानिक मूल्यांची परंपरा जपणाऱ्या काँग्रेस पक्षाच्या वैचारिक अधिष्ठानाला उजाळा देत या कार्यक्रमातून कार्यकर्त्यांमध्ये नवे चैतन्य आणि ऊर्जा निर्माण झाल्याचे चित्र दिसून आले.
कार्यक्रमाची सुरुवात काँग्रेस सेवा दलाच्या शिस्तबद्ध वंदे मातरम् गायनाने झाली. त्यानंतर ध्वजारोहण व राष्ट्रगीत गायन करण्यात आले. जळगाव जिल्ह्यातील विविध गावांतून मोठ्या संख्येने काँग्रेस कार्यकर्ते, पदाधिकारी आणि नेते उपस्थित राहून या सोहळ्याला व्यापक स्वरूप प्राप्त झाले.
यावेळी उपस्थित नेत्यांनी देशाच्या स्वातंत्र्यलढ्यात काँग्रेस पक्षाने दिलेल्या ऐतिहासिक योगदानाचा आढावा घेतला. महात्मा गांधी, पंडित जवाहरलाल नेहरू, इंदिरा गांधी यांच्यासह अनेक नेत्यांच्या विचारधारेचा वारसा पुढे नेण्याची गरज अधोरेखित करण्यात आली. तसेच जळगाव जिल्ह्याच्या सामाजिक, शैक्षणिक व आर्थिक विकासात काँग्रेसने बजावलेल्या भूमिकेचा उल्लेख करत पक्षाच्या कार्याचा अभिमानाने गौरव करण्यात आला.
मागील काही वर्षांत स्थानिक आघाड्या आणि राजकीय समीकरणांमुळे काँग्रेस संघटना काहीशी कमजोर झाली असली, तरी आता पुन्हा तळागाळातून संघटना मजबूत करण्याचा निर्धार यावेळी नेत्यांनी व्यक्त केला. बूथ पातळीवर कार्यकर्त्यांना सक्रिय करून जनतेच्या प्रश्नांसाठी रस्त्यावर उतरून लढा देण्याची भूमिका स्पष्ट करण्यात आली.
नगरपरिषद निवडणूक २०२५ मध्ये काँग्रेसच्या वतीने निवडणूक लढवलेल्या सर्व उमेदवारांचा यावेळी सन्मान करण्यात आला. “जनतेसाठी प्रामाणिकपणे लढणे हाच खरा विजय आहे,” असे मत व्यक्त करत, अपयशातूनही ताकद घेऊन पुढील निवडणुकी लढतींसाठी सज्ज राहण्याचा संदेश देण्यात आला.
कार्यक्रमाच्या शेवटी पक्षासाठी आपले आयुष्य वाहिलेल्या दिवंगत काँग्रेस कार्यकर्त्यांना भावपूर्ण श्रद्धांजली अर्पण करण्यात आली. त्यांच्या कार्याची आठवण करून देत, त्यांच्या विचारांना पुढे नेण्याचा संकल्प उपस्थितांनी व्यक्त केला.
या कार्यक्रमाला माजी आमदार शिरीषदादा चौधरी, माजी आमदार रमेशदादा चौधरी, जिल्हाध्यक्ष प्रदीप पवार, माजी जिल्हाध्यक्ष संदीपभैय्या पाटील, मुफ्टी हारून नडवी साहेब, धनंजय चौधरी, अतुल सुभाष पाटील, ऐश्वर्यताई राठोड, छाया अतुल पाटील, राजू सूर्यवंशी, संजय पाटील, ज्ञानेश्वर कोळी, जमील शेख, प्रविन सुरवाडे, योगेंद्रभैय्या पाटील, राजेंद्र पाटील, रियाज शेख, हकीम शेठ, धुमा तायडे यांच्यासह जळगाव जिल्ह्यातील काँग्रेस पक्षाचे तालुकाध्यक्ष, शहराध्यक्ष, पदाधिकारी, कार्यकर्ते आणि नगरपरिषद उमेदवार मोठ्या संख्येने उपस्थित होते.
एकूणच, खिरोदा येथे साजऱ्या झालेल्या काँग्रेसच्या १४० व्या स्थापना दिनाच्या कार्यक्रमातून पक्षाची वैचारिक परंपरा, संघटनात्मक ताकद आणि आगामी काळातील लढ्याची दिशा स्पष्ट झाली असून, जिल्ह्यात काँग्रेस पुन्हा नव्या जोमाने उभी राहण्याचे संकेत मिळाले आहेत.
