मुंबई-लाईव्ह ट्रेंडस न्यूज वृत्तसेवा । महाराष्ट्रात थंडीचा कडाका अचानक मोठ्या प्रमाणात वाढला आहे. उत्तरेकडील राज्यांतून येणाऱ्या थंड वाऱ्यांमुळे राज्यातील किमान तापमानाचा पारा लक्षणीयरीत्या खाली आला असून, येत्या काही दिवसांत थंडी अधिक तीव्र होणार असल्याचा अंदाज भारतीय हवामान खात्याने वर्तवला आहे. विशेषतः ११ डिसेंबरच्या आसपास तापमानात मोठी घसरण अपेक्षित आहे.
खान्देशात थंडीने कहर केला आहे. नाशिकमध्ये पारा ७ अंशांपर्यंत खाली जाईल, तर जळगावमध्ये तापमान ६ अंशांवर पोहोचण्याचा अंदाज आहे. यामुळे जळगाव जिल्हा राज्यातील सर्वात थंड ठिकाणांपैकी एक ठरण्याची शक्यता आहे. नंदुरबार, धुळे आणि अहिल्यानगर जिल्ह्यांतही मोठी गारठ्याची लाट जाणवणार आहे.
पश्चिम महाराष्ट्र आणि खान्देशात तीव्र गारठा:
सर्वात जास्त थंडीचा अनुभव पश्चिम महाराष्ट्र आणि उत्तर महाराष्ट्रात अपेक्षित आहे. पुणे शहरात १० डिसेंबरला किमान तापमान ८ अंशांपर्यंत, तर पुढील दोन दिवसांत ते ७ अंश सेल्सिअसवर पोहोचण्याची शक्यता आहे. पुणे आणि सोलापूर जिल्ह्यांसाठी हवामान खात्याने ‘यलो अलर्ट’ जारी केला आहे.
मुंबईतही लक्षणीय घट:
थंडीपासून दूर असलेल्या मुंबई आणि उपनगरांतही तापमानात लक्षणीय घट होणार आहे. मुंबईत किमान तापमान सुमारे १५ अंशांपर्यंत खाली येण्याची शक्यता आहे. कोकण किनारपट्टीवरही पहाटे व संध्याकाळी थंडीची चांगलीच चाहूल जाणवेल.
मराठवाडा आणि विदर्भ:
मराठवाड्यातील छत्रपती संभाजीनगर, जालना, बीड आणि परभणी जिल्ह्यांसाठी १० डिसेंबर रोजी ‘यलो अलर्ट’ जारी करण्यात आला आहे. येथे सकाळच्या वेळी गारठा असला तरी दुपारचे ऊन कायम राहील. विदर्भात सध्या थंडीचा जोर जाणवत असला तरी, नागपूरमध्ये किमान तापमान ९ अंश आणि अमरावतीत ११ अंश सेल्सिअसपर्यंत राहण्याची शक्यता आहे.
