धरणगाव-लाईव्ह ट्रेंडस न्यूज प्रतिनिधी । शहरातील हेडगेवार नगरातून एका महिलेच्या घरातून मध्यरात्री सोन्याचे दागिने आणि मोबाईल असा एकूण १ लाख ७३ हजार रुपये किमतीचा ऐवज चोरून नेल्याची धक्कादायक घटना १२ ऑगस्ट रोजी घडली. या प्रकरणी धरणगाव पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
मालुबाई विजयानंद केदार (वय ५४, रा. हेडगेवार नगर, धरणगाव) या आपल्या कुटुंबियांसह राहतात. १२ ऑगस्टच्या मध्यरात्री त्या झोपलेल्या असताना, अज्ञात चोरट्याने त्यांच्या घरात प्रवेश केला. चोरट्याने घरातील १ लाख ७३ हजार रुपये किमतीचे सोन्याचे दागिने आणि एक मोबाईल चोरून नेला. मध्यरात्री सुमारे १ वाजण्याच्या सुमारास हा प्रकार समोर आला.
चोरी झाल्याचे लक्षात येताच, मालुबाई केदार यांनी तात्काळ धरणगाव पोलीस ठाण्यात धाव घेऊन तक्रार दिली. त्यांच्या तक्रारीवरून, दुपारी २ वाजता धरणगाव पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. या घटनेमुळे धरणगाव शहरातील नागरिकांमध्ये भीतीचे वातावरण निर्माण झाले आहे.
या प्रकरणाचा पुढील तपास पोलीस उपनिरीक्षक दत्तात्रय बडगुजर करत आहेत. पोलिसांनी तातडीने तपास सुरू केला असून, चोरट्यांचा शोध घेण्यासाठी आवश्यक पावले उचलली जात आहेत. नागरिकांनी आपल्या घरांची आणि मौल्यवान वस्तूंची काळजी घ्यावी, असे आवाहन पोलिसांनी केले आहे.
