धरणगाव लाईव्ह ट्रेंडस न्यूज प्रतिनिधी । धरणगाव तालुक्यातील पाळधी येथील प्रसिद्ध साईबाबा मंदिर परिसरात सोमवारी १६ मार्च रोजी दुपारी एक मोठी दुर्घटना घडली. पर्यटन विकास प्रकल्पांतर्गत सुरू असलेल्या शासकीय भक्त निवासाच्या बांधकामाचा स्लॅब अचानक कोसळल्याने ७ कामगार गंभीररीत्या जखमी झाले आहेत. या घटनेमुळे मंदिर परिसरात एकच खळबळ उडाली असून बांधकामाच्या गुणवत्तेवर आणि कामगारांच्या सुरक्षेवर आता प्रश्नचिन्ह उपस्थित केले जात आहे.
अचानक कोसळला स्लॅब, कामगारांची आरडाओरड :
मिळालेल्या माहितीनुसार, पाळधी येथील साईबाबा मंदिर परिसरात शासकीय निधीतून भक्त निवासाचे काम युद्धपातळीवर सुरू आहे. आज दुपारी कामगार छताच्या स्लॅबचे काम करत असताना अचानक संपूर्ण सांगाडा कोसळला. ढिगाऱ्याखाली दबले गेल्याने कामगारांमध्ये एकच धावपळ आणि आरडाओरड झाली. स्थानिक नागरिक आणि मंदिर प्रशासनाने तातडीने धाव घेत ढिगाऱ्याखाली अडकलेल्या कामगारांना बाहेर काढले.
७ जखमी; जिल्हा रुग्णालयात उपचार सुरू :
या भीषण दुर्घटनेत एकूण ७ कामगार जखमी झाले आहेत. सर्वांना तातडीने रुग्णवाहिकेद्वारे जळगाव जिल्हा शासकीय रुग्णालयात दाखल करण्यात आले आहे. जखमींपैकी दोन कामगारांच्या डोक्याला आणि पाठीला गंभीर दुखापत झाली असून त्यांची प्रकृती चिंताजनक असल्याचे वैद्यकीय सूत्रांकडून सांगण्यात आले आहे. सुदैवाने, या मोठ्या दुर्घटनेत कोणतीही जीवितहानी झाली नाही, मात्र जखमींवर अतिदक्षता विभागात उपचार सुरू आहेत.
सुरक्षा साधनांचा अभाव? गावकऱ्यांचा संताप :
घटनेची माहिती मिळताच पाळधीचे माजी जिल्हा परिषद सदस्य प्रताप पाटील यांनी घटनास्थळी धाव घेतली आणि जखमींच्या मदतीसाठी पुढाकार घेतला. यावेळी त्यांनी माध्यमांशी बोलताना सांगितले की, “सुदैवाने मोठी जीवितहानी टळली असली तरी ही घटना अतिशय गंभीर आहे.” कामाच्या ठिकाणी कामगारांना हेल्मेट, बेल्ट किंवा इतर कोणतीही आवश्यक सुरक्षा साधने पुरवण्यात आली नव्हती, असा खळबळजनक आरोप आता कामगार वर्गातून केला जात आहे.
तपासाची मागणी ऐरणीवर :
शासकीय कामात कंत्राटदाराने निष्काळजीपणा केला का? सिमेंट आणि लोखंडाचा दर्जा योग्य होता का? असे अनेक प्रश्न आता उपस्थित होत आहेत. या दुर्घटनेचे नेमके तांत्रिक कारण अद्याप स्पष्ट झालेले नसले तरी, संबंधित विभागाच्या अभियंत्यांनी याकडे दुर्लक्ष केल्याची चर्चा परिसरात सुरू आहे. या प्रकरणाची सखोल चौकशी करून दोषींवर कठोर कारवाई करण्याची मागणी ग्रामस्थांनी केली आहे.
